16 ta tuman va shaharda mahalliy boshqaruv organlari uchun yangi ma’muriy binolar quriladi

«Jadal kompleks rivojlantirish uchun tanlab olingan tumanlar va shaharlarda mahalliy boshqaruv organlarini optimal joylashtirish orqali ularning bino va inshootlari o‘rnida biznes loyihalarni amalga oshirish chora-tadbirlari to‘g‘risida»gi hukumat qarori qabul qilindi.

Qarorga ko‘ra:

- 16 ta tuman va shaharning 2025-2026 yillarda jadal kompleks rivojlantirish dasturlari;

- bir joyda optimal joylashtiriladigan tuman va shahar mahalliy boshqaruv organlari ro‘yxati tasdiqlandi.

Qarorda 16 ta tuman va shaharda yangi ma’muriy binolar qurilishi belgilangan. Ularning 1- va 2-qavatlari ustuvor ravishda savdo va servis faoliyatini amalga oshirish uchun belgilangan tartibda E-auksion elektron savdo platformasida elektron onlayn-auksion savdolari orqali ijaraga beriladi.

Tuman va shaharlar mahalliy boshqaruv organlari uchun yangi ma’muriy binolarning loyiha-smeta hujjatlarini ishlab chiqish, qurilish-montaj va obodonlashtirish ishlarini amalga oshirish doirasida:

- buyurtmachilar etib – Qoraqalpog‘iston Respublikasi Vazirlar Kengashi va viloyatlar hokimliklari huzuridagi «Yagona buyurtmachi xizmati» injiniring kompaniyasi belgilandi;

- bosh loyiha va bosh pudrat tashkilotlari qonunchilikda belgilangan tartibda aniqlanadi.

Bunda yangi ma’muriy binolarning loyiha-smeta hujjatlarini ishlab chiqish, qurilish-montaj va obodonlashtirish ishlarini 2026 yil 1 dekabrga qadar yakunlash belgilab qo‘yildi.