Zelenskiy Germaniyaga Patriot majmualari uchun minnatdorlik bildirdi

Ukraina prezidenti Volodimir Zelenskiy Germaniyaga Amerika ishlab chiqargan Patriot ZRKni yetkazib bergani uchun minnatdorlik izhor etdi. «Ukraina havo mudofaamizdagi “patriotlar” tarkibiy qismini mustahkamladik», — deb yozdi u 2 noyabr kuni Telegram’da.

«Germaniyaga va shaxsan kansler Fridrix Mersga odamlar hayotini himoya qilishga qaratilgan ushbu qadam uchun minnatdorchilik bildiraman. Bir qancha vaqt davomida HHMni kuchaytirishga tayyorgarlik ko‘rdik va endi erishilgan kelishuvlar bajarildi», — deb qo‘shimcha qildi Zelenskiy.

Zelenskiy Germaniyadan Ukrainaga nechta Patriot tizimi berilgani, qaysi konfiguratsiyada va qaysi mablag‘ga yetkazilganini ochiqlamadi. Norasmiy German Aid to Ukraine (“Germaniya yordami Ukrainaga”) Twitter-akkaunti ma’lum qilishicha, so‘z MIM-104 Patriot'ning ikki tizimi haqida bormoqda: ular Bundesver zaxiralaridan Daniya, Litva va Norvegiya mablag‘lari hisobidan Kiyevga berilgani aytildi.

DW Germaniya Mudofaa vazirligiga ushbu ma’lumotni tasdiqlash uchun murojaat qildi. Idora eslatishicha, 2025 yil iyul oyi o‘rtasida vazir Boris Pistorius Pentagonga tashrifdan so‘ng «Germaniya Ukrainaga yana ikkita Patriot tizimini taqdim etadi», deb kelishgan edi. «Pit Xegset bilan tuzilgan kelishuvga muvofiq, Germaniya AQShdan yangi Patriot tizimlarini sotib olishda ustuvor huquqqa ega bo‘ladi», — deyilgan vazirlik javobida.

Shuningdek, Berlin Ukrainaga barcha boshqa ittifoqchi mamlakatlarga qaraganda ko‘proq Patriot tizimlarini bergani, Rossiyaning kompleks hujumlariga qarshi turadigan IRIS-T va Skynex tizimlari bilan Kiyevni qo‘llab-quvvatlayotgani ta’kidlandi. Vazirlik 2025 yil 1 avgust kuni chiqarilgan press-relizga ishora qildi, unda Ukrainaga ikkita Patriot yetkazish niyati bayon etilgan. «Harbiy xavfsizlikni ta’minlash maqsadida amalga oshirilgan yetkazib berishlar haqida qo‘shimcha tafsilotlarni ochiqlamaymiz. Bu boradagi ma’lumotni faqat Ukraina tomoni taqdim etishi mumkin», — deyildi bayonotda.

Yozda Germaniya hukumati AQSh bilan Ukraina uchun ikkita Patriot ZRK sotib olish bo‘yicha kelishganini ma’lum qilgan edi. O‘shanda mudofaa vaziri Boris Pistorius jami beshta Patriot tizimi Ukraina uchun zarurligini aytgan va «Germaniya o‘z hissasini qo‘shadi», deb va’da bergan.

GFR Mudofaa vazirligi DW’ga Berlin Ukraina uchun yana ikkita qo‘shimcha Patriot tizimini moliyalashtirishga rozi bo‘lgani, qolganlarini esa «hamkorlar yetkazishni istashi»ni bildirgan edi.