Pokiston bilan to‘g‘ridan to‘g‘ri moliyaviy operatsiyalar yo‘lga qo‘yiladi

O‘zbekiston elchisi Alisher To‘xtayev Pokiston savdo vaziri o‘rinbosari Mari Kazi bilan uchrashuvda ikki davlat o‘rtasida to‘g‘ridan to‘g‘ri moliyaviy operatsiyalar tizimini shakllantirish, savdo aylanmasini 2 mlrd dollarga yetkazish va logistikani optimallashtirish bo‘yicha amaliy choralarni muhokama qildi.

Foto: “Dunyo” AA

“Dunyo” AA ma’lumotiga ko‘ra, tomonlar savdo-iqtisodiy hamkorlikni chuqurlashtirish, investitsiya va sanoat kooperatsiyasini kengaytirish, bank-moliya munosabatlarini takomillashtirish, shuningdek transport va logistika bo‘yicha dolzarb masalalarni atroflicha ko‘rib chiqdi.

Uchrashuvda quyidagi yo‘nalishlar bo‘yicha kelishuv va takliflar muhokama qilindi:

to‘g‘ridan to‘g‘ri moliyaviy operatsiyalarni amalga oshirish tizimini yo‘lga qo‘yish;
o‘zaro savdo aylanmasini 2 mlrd dollarga yetkazish vazifalari;
imtiyozli savdo to‘g‘risidagi bitim doirasida mahsulotlar ro‘yxatini kengaytirish;
transport-logistika zanjirini optimallashtirish va barqaror ishlashini ta’minlash;
fitosanitar hamkorlik samaradorligini saqlash, farmatsevtika, elektrotexnika va sanoat uskunalari bo‘yicha muloqotlarni faollashtirish;
standartlar va sertifikatlash tizimlarini o‘zaro tan olish, to‘g‘ridan to‘g‘ri yetkazib berishni yo‘lga qo‘yish hamda qo‘shma ishlab chiqarish loyihalarini amalga oshirish;
hududlararo hamkorlikni kuchaytirish va “O‘zbekiston–Pokiston hududlararo forumi”ni o‘tkazish;
mintaqaviy integratsiya doirasida Transafg‘on temiryo‘lini bunyod etish masalalariga e’tibor qaratish.