Ayrim xizmatlar xususiy klinikalarga sug‘urta orqali to‘lanadi

Yig‘ilishda xususiy sektorning tibbiy xizmatlardagi roli kengayayotgani ta’kidlandi. So‘nggi sakkiz yilda xususiy klinika va laboratoriyalar soni uch karraga oshib, 9 mingga yetdi, ulardagi shifo o‘rinlari 57 mingtagacha ko‘paydi. Hozirda mamlakatdagi umumiy tibbiy xizmatlarning taxminan 30 foizi xususiy sektor tomonidan ko‘rsatilayotgani, innovatsion tashabbuslar ham asosan shu yerdan chiqayotgani qayd etildi.

Shu munosabat bilan, mutasaddilarga ikki yo‘nalishda vazifa berildi:

• tarif — respublika ixtisoslashgan markazlarida narxlar bozor va sifat mezonlariga mos ravishda qayta ko‘rib chiqiladi;
• sug‘urta mexanizmlari — bir xil xizmat xususiy sektorda arzon va sifatli bo‘lsa, to‘lovlar tibbiy sug‘urta hisobiga shu klinikalarga yo‘naltiriladi.

Bu qadam raqobatni kuchaytirib, bemor uchun xizmat sifati va qo‘layligini oshirish, davlat muassasalarini ham samaradorlikka undashga qaratilgan. Prezident davlat–xususiy sheriklikni kengaytirish bo‘yicha barcha takliflarni ko‘rib chiqishga tayyorligini bildirdi.