BBC bosh direktori Trampning nutqi soxtalashtirilgani tufayli iste’foga chiqdi

Bi-bi-si bosh direktori Tim Devi va News bosh direktori Debora Terness iste’foga chiqdi, deb xabar berdi Daily Mail.

Bu AQSh prezidenti Donald Trampning nutqini soxtalashtirib, tomoshabinlarni chalg‘itgan BBC Panorama hujjatli filmiga nisbatan tanqidlar ortidan yuz berdi.  

Avvalroq The Telegraph sobiq jurnalist Maykl Preskott tomonidan yozilgan va Bi-bi-si direktorlar kengashiga yo‘llangan memorandumni chop etgandi. Preskottning ta’kidlashicha, telekompaniya Trampning 2021 yil 6 yanvarda Kapitoliyga hujum oldidan so‘zlagan nutqini soxtalashtirgan. 

Memorandumda aytilishicha, efirda o‘sha kungi voqealar xronologiyasi buzib ko‘rsatilgan va prezidentning nutqi mazmuni haqida yolg‘on taassurot hosil qilingan.

Shundan so‘ng AQSh prezidentining matbuot kotibi Kerolayn Levitt The Telegraph nashriga bergan intervyusida Bi-bi-sini «so‘l targ‘ibot mashinasi» va «soxta OAV» deb atadi.

2021 yil 6 yanvar kuni, Tramp saylovlarda mag‘lub bo‘lganidan ikki oy o‘tgach, uning tarafdorlari Kapitoliy binosiga bostirib kirishgandi. Bu yerda saylovlarda Jo Bayden g‘alaba qozonganini tasdiqlash uchun kongress yig‘ilishi o‘tkazilishi kerak edi. O‘shanda to‘qnashuvlar oqibatida besh kishi halok bo‘ldi,140 nafar politsiyachi jarohatlandi.  

Ushbu voqeadan so‘ng Trampga qarshi bir nechta jinoyat ishlari ochildi va u prezidentlikka saylanganidan so‘ng bu ishlar yopildi.