Tibbiy xizmatlar eksportini oshirgan markazlarga alohida mukofot beriladi

26 ta respublika ixtisoslashgan markazi o‘rtasida natijaga tayanadigan rag‘batlantirish tizimi joriy etiladi: klinik protokollarni yangilagan, yangi davolash usullarini kiritgan, hududlarda ishni to‘g‘ri tashkil etgan, xorijiy hamkor va investitsiya jalb etgan, zamonaviy uskuna–laboratoriyalar bilan jihozlagan va tibbiy xizmatlar eksportini oshirgan markaz rahbarlari alohida taqdirlanadi.

Foto: Prezident matbuot xizmati

Yig‘ilishda rag‘batlantirish mezonlari aniq bayon etildi. Unga ko‘ra, ixtisoslashgan markazlar va ularning filiallarida:

klinik protokollarni ilg‘or tajriba asosida yangilash;
yangi davolash usullarini amaliyotga joriy etish;
tuman–mahalla darajasida profilaktika va xizmatlarni to‘g‘ri yo‘lga qo‘yish;
xalqaro hamkorlikni kengaytirish, mutaxassislar va investitsiyalarni jalb etish;
markazlarni zamonaviy uskuna va laboratoriyalar bilan jihozlash;
tibbiy xizmatlar eksporti hajmini bir necha barobar oshirish kabi natijalarga erishgan rahbarlar alohida mukofot va e’tirofga loyiq deb topiladi.

Prezident ta’kidlashicha, bunday yondashuv poliklinika, tuman–viloyat shifoxonalari va respublika markazlarida raqobat va ishchanlik muhitini kuchaytiradi, yaxshi tajribalarni ommalashtiradi, munosib soha vakillarini adolatli mukofotlashni ta’minlaydi, jarayonga fuqarolarni ham faol ishtirokchi sifatida jalb etadi.