"Proyekt": RFda yuqori darajadagi davlat xizmatchilarining 76 foizi hokimiyatda qarindoshlarga ega

Davlat tuzilmalarida yuqori lavozimda ishlaydigan rossiyaliklarning uch qismiga yaqini — aniqrog‘i, 76 foizi — hokimiyatda yoki hokimiyatga bog‘liq biznesda band bo‘lgan qarindoshlarga ega. Bu xulosalar “Proyekt” onlayn-nashri o‘tkazgan surishtiruv natijalari bo‘lib, u 10 noyabr kuni e’lon qilindi.

Jurnalistlar davlat boshqaruvining asosiy sohalaridagi (prezident Vladimir Putindan tortib eng yirik muzeylar direktorlarigacha) 1329 nafar mansabdorning qarindoshlik aloqalarini o‘rgandi. Natijada tekshiruv qahramonlaridan 1012 nafarida hokimiyat tizimida, davlatga bog‘liq biznesda, jamoat va siyosiy tashkilotlarda ishlaydigan qarindoshlar mavjudligi aniqlandi.

“Bu ulkan ulush — har to‘rt rossiyalik rahbardan uch nafari yo o‘zi boshqa amaldorlarga ‘merosxo‘r’, yoki farzandlari hayotini davlat hisobidan ta’minlab qo‘ygan”, — deb yozadi mualliflar.

Hokimiyat organlari orasida, xodimlarining barchasi istisnosiz hokimiyatda yoki hokimiyatga bog‘liq biznesda qarindoshi bor deb qayd etilgan tuzilmalar quyidagilar: Rossiya to‘g‘ridan to‘g‘ri investitsiyalar jamg‘armasi (RFPI), Oliy sud va Mudofaa vazirligi. Xuddi shunday holat Sberbank, VTB, Gazprombank, Rosselxozbank kabi banklarda, shuningdek “Rostelekom”, iqtisodiy rivojlanish va investitsiyalarga mas’ul davlat korporatsiyasi VEB.RF, “Avtodor”, RJD va “Gazprom”da ham kuzatilgan.

Hokimiyatda yoki u bilan bog‘liq biznesda qarindoshi borlar ulushi Rossiya Bankida 92 foiz, Bosh prokuraturada 91 foiz, IIVda 89 foiz, Federatsiya Kengashida 86 foiz va Davlat dumasida 84 foizni tashkil etgani aytiladi. Aksincha, bu ko‘rsatkich Fan va oliy ta’lim vazirligida 33 foiz, “Minsifra”da 36 foiz, Sog‘liqni saqlash vazirligida 36 foiz atrofida.

Bundan tashqari, jurnalistlar hokimiyatda yoki hokimiyatga bog‘liq biznesda eng ko‘p qarindoshi bor 25 mansabdor ro‘yxatini tuzgan. Unga ko‘ra, birinchi o‘rinda — Checheniston rahbari Ramzon Qodirov. Uning shunday qarindoshlari 96 nafar. Keyingilar: RF prezidenti Vladimir Putin (27 qarindosh), Federatsiya Kengashi a’zosi Arsen Kanokov (19), “Rostex” rahbari Sergey Chemezov (16), RF prezidenti yordamchisi Nikolay Patrushev (15). “Proyekt” buni “hokimiyat sulolalari” deb ataydi.

Vladimir Putinning qarindoshlari va unga yaqin shaxslar orasida, “Proyekt” ma’lumotlariga ko‘ra, “Rossiyani boshqarishda ishtirok etadiganlar” sifatida prezidentga yaqinlardan Svetlana Krivonogix — “Rossiya” banki aksiyadoriga aylangan.