DW’ning AFP agentligiga tayanib xabar berishicha, namoyish 22-oktabr kuni oʻtkazilgan. Ishtirokchilar Aleksandar Vuchich hukmronligiga chek qoʻyishni talab qilib, saylovchilarni «Talabalar roʻyxati»ni qoʻllab-quvvatlashga chaqirgan.
25-oktabrga belgilangan muddatidan oldingi parlament saylovlari qariyb ikki yildan beri davom etayotgan norozilik namoyishlari ortidan oʻtkazilmoqda.
Namoyishlarga 2024-yil noyabrida Novi-Sad shahridagi temiryoʻl vokzali tomining qulashi turtki boʻlgan. Yaqindagina taʼmirlangan vokzaldagi fojia oqibatida 16 kishi halok boʻlgan. Mustaqil OAV va muxolifat fojianing asosiy sabablaridan biri sifatida korrupsiyani koʻrsatgan.
Keyinchalik mamlakat boʻylab kengaygan norozilik harakatining asosiy kuchiga talabalar aylangan. Shu harakat negizida «Talabalar roʻyxati» shakllangan.
Uning yaqqol ajralib turadigan yagona yetakchisi yoʻq. Harakat saylovda professional siyosatchilar oʻrniga olimlar, faollar va jamoat arboblarini oʻz vakillari sifatida koʻrmoqchi.
«Yangi serb siyosiy tafakkuri» loyihasining 20-oktabrda eʼlon qilingan soʻroviga koʻra, ishtirokchilarning 44,5 foizi «Talabalar roʻyxati»ga, 42,7 foizi esa Vuchich tayanadigan Serbiya taraqqiyotparvar partiyasiga ovoz berishga tayyorligini bildirgan.
Oktabr boshidagi xuddi shunday soʻrovda talabalar harakati 44,4 foiz, hukmron partiya esa 41,7 foiz qoʻllab-quvvatlovga ega boʻlgan. Bu koʻrsatkichlar saylov natijasi emas, soʻrov qatnashchilarining oʻsha paytdagi qarashlarini aks ettiradi.
Muxolifat partiyalarining aksariyati saylov poygasidan chiqib, oʻz tarafdorlarini talabalar harakatini qoʻllab-quvvatlashga chaqirgan.
Namoyishchilarning asosiy talablaridan biri Vuchichning isteʼfosi boʻlib kelmoqda. Biroq DW xabariga koʻra, u prezidentlikdan ketish haqidagi bayonotlariga qaramay, parlament saylovlaridan keyin bosh vazir lavozimini egallashni koʻzlamoqda. Hukmron partiyaning gʻalabasi uning hokimiyatda qolishiga yoʻl ochishi mumkin.
Vuchich avval ham, 2014–2017-yillarda Serbiya bosh vaziri boʻlgan. 2017-yilda prezidentlik saylovida gʻalaba qozongach, davlat rahbari lavozimiga oʻtgan. Shundan buyon bosh vazirlikni uning partiyasi vakillari egallab kelgan.
