“G‘ishtko‘prik”da yangi intellektual bojxona posti barpo etilmoqda

Davlat bojxona qo‘mitasi raisi A.Mavlonov qurilish-bunyodkorlik ishlari jadal davom etayotgan “G‘ishtko‘prik” chegara bojxona postida bo‘ldi.

Ma’lum qilinishicha, hozirda 9 gektar maydonni qamrab olgan mazkur obekt oddiy raqamlashgan post emas, balki intellektual bojxona posti sifatida qayta shakllantirilmoqda.

Shu vaqtga qadar faqat jismoniy shaxslar uchun qo‘llanilib kelingan ikki yo‘lakli — “yashil” va “qizil” yo‘lak tizimi endilikda yengil avtotransport vositalari uchun ham joriy etiladi.

Bu maqsadda ushbu postga nafaqat respublika, balki butun mintaqada ilk bor yengil avtotransport vositalari uchun mo‘ljallangan Z portal skaner majmuasi o‘rnatildi. Postda navbatlarning oldini olish uchun 16 ta avtoyo‘lak barpo etilgan, avtobuslar esa alohida yo‘laklar orqali harakatlanadi.

Natijada, post orqali bir kunda 1 500 dan ortiq avtotransport vositasi va 50 mingdan ziyod yo‘lovchi bemalol o‘tishi imkoniyati yaratiladi.

Inshootda “yashil energiya”dan foydalanishga ham alohida e’tibor qaratilgan: quyosh panellari bir vaqtning o‘zida elektr energiyasi bilan ta’minlash va avtoturargoh vazifasini bajaradi.

Qurilish loyihasini amalga oshirishda hududni ko‘kalamzorlashtirish, mavjud daraxtlarni asrab qolishga alohida e’tibor qaratilgan. Loyihalash ishlari daraxtlarning joylashuvidan kelib chiqib ta’minlangan, joriy kuzgi mavsumda esa qo‘shimcha 2 mingta ko‘chat ekilgan.