Omonxona BMT Turizm tashkilotining turizm qishloqlarini rivojlantirish dasturiga kiritildi

BMT Turizm tomonidan navbatdagi “Eng yaxshi turizm qishloqlari” (Best Tourism Villages) loyihasi g‘oliblari e’lon qilindi. Mazkur global tashabbus turizm qishloqlariga e’tiborni kuchaytirish, kichik qishloqlarning o‘ziga xos madaniyati, urf-odatlari va tabiat go‘zalliklarini asrab-avaylash maqsadida amalga oshiriladi.

Joriy yilgi tanlovda Afrika, Amerika, Osiyo va Yevropadagi 65 ta mamlakatdan 270 dan ortiq nomzod qishloqlar ishtirok etdi.

O‘zbekiston tomonidan Turizm qo‘mitasi Surxondaryo viloyati Boysun tumanida joylashgan Omonxona qishlog‘i nomzodini taqdim etdi. Natijada Omonxona qishlog‘i tanlov g‘oliblaridan biri deb topilib, loyihaning “Rivojlantirish dasturi” (Upgrade Programme)ga kiritildi. Bu xalqaro miqyosda O‘zbekiston turizm tarmog‘ining navbatdagi yutug‘i sifatida e’tirof etilmoqda.

Surxondaryo viloyati Boysun tumani tog‘li hududida joylashgan Omonxona qishlog‘i o‘zining tabiiy manzaralari, shifobaxsh buloqlari, tarixiy yodgorliklari, nomoddiy madaniy merosi va mehmondo‘st aholisi bilan mashhur. So‘nggi yillarda bu yerda turizm infratuzilmasi bosqichma-bosqich rivojlantirilib, sayyohlar uchun qulay sharoitlar yaratish maqsadida qishloq hududida turizm markazi barpo etilmoqda. 2024 yilda Omonxona qishlog‘iga O‘zbekistonning “turizm qishlog‘i” maqomi berilgan edi.

Omonxonaning mazkur dasturga kiritilishi nafaqat xalqaro e’tirof, balki mamlakatning qishloq hududlarini barqaror rivojlantirish va yangi turizm nuqtalarini shakllantirishga qaratilgan izchil siyosat samarasi sifatida ham baholanmoqda.

BMT Turizmning “Rivojlantirish dasturi”ga dunyoda turizm salohiyati yuqori bo‘lgan nufuzli qishloqlar tanlov asosida kiritiladi. Dastur doirasida mutaxassislar ko‘magi, o‘quv dasturlari va texnik maslahatlar orqali qishloqning turizm salohiyatini yanada oshirish, uni xalqaro maydonda targ‘ib etish ko‘zda tutilgan.

Jumladan, BMT Turizm ekspertlari tomonidan turizm infratuzilmasini rivojlantirish bo‘yicha strategik yo‘l xaritasini ishlab chiqish, xalqaro ekspertlar ishtirokida trening va konsultatsiyalar o‘tkazish, mahalliy boshqaruv, xizmat sifati va marketing tizimlarini ilg‘or xalqaro tajriba asosida yaxshilash rejalashtirilgan. Shuningdek, qishloqni “Eng yaxshi turizm qishloqlari tarmog‘i”ga (Best Tourism Villages Network) qo‘shish orqali boshqa davlatlar bilan hamkorlik va tajriba almashish imkoniyatlari yaratiladi.

Ma’lumot uchun, BMT Turizmning “Eng yaxshi turizm qishlog‘i” tanlovi 2021 yildan buyon o‘tkazib kelinmoqda. Ushbu maqom ekologik va agroturizm yo‘nalishlarida yuqori ko‘rsatkichlarga ega, tabiiy hamda madaniy qadriyatlarini, organik ovqatlanish va an’anaviy turmush tarzini asrab qolgan qishloqlarga beriladi.

2023 yilda Navoiy viloyatida joylashgan Sentob qishlog‘i mazkur nufuzli e’tirofga sazovor bo‘lgan edi.