Sariosiyo tumani hokimi o‘rinbosari ozodlikdan mahrum qilindi

Surxondaryo viloyati Sariosiyo tumani hokimi o‘rinbosari A.Q. sud hukmi bilan firibgarlik jinoyatini sodir qilganlikda aybli deb topildi. Kun.uz sud hujjati bilan tanishdi.

Sud hukmida keltirilishicha, 40 yoshli A.Q. 2020 yil may oyidan qamoqqa olingan kuni – 2025 yil 22 sentabr kuniga qadar Sariosiyo tumani hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari lavozimida ishlab kelgan.

U 2025 yil 5 fevral kuni o‘z xizmat xonasida tanishlari G.S. va S.D.ni qabul qilgan. Hokim o‘rinbosari suhbat jarayonida S.D.ga uni tuman maktabgacha va maktab ta’limi bo‘lim rahbariga topshiriq berish orqali bog‘chaga ishga kiritib qo‘yishni va’da bergan. Buning uchun xizmat xonasida tanishi S.G. vositachiligida 500 dollar olib, pulni o‘z ehtiyojlariga sarflab yuborgan.

A.Q. sudda aybiga qisman iqror bo‘lgan va pulni qarz sifatida olganini, keyinchalik bu pulni oila a’zolari orqali qaytarib berganini bildirgan.

“S.D. qarzga 500 dollar pul olib kelib bergan. Unga pul evaziga ishga kiritishni va’da qilmaganman. S.D. turmush o‘rtog‘imning uzoq qarindoshi bo‘ladi. O‘g‘lim avtohalokatga uchragani, mashinani ta’mirlash uchun pul kerak bo‘lib qolgani uchun S.D.dan qarzga 500 dollar so‘raganman. U mendan Yangi hayot mahallasiga ishga kirish masalasini so‘ragan. “Kirsang bo‘ladi, joy bo‘shaydi, bog‘cha mudirasi “dekret”ga chiqyapti”, deya tavsiya berganman”, degan hokim o‘rinbosari suddagi ko‘rsatmasida.

Guvohlar S.D. va G.S. sudda tergovdagi ko‘rsatmasini o‘zgartirib, pulni hokim o‘rinbosariga qarz sifatida berishganini, A.Q. ishi bo‘yicha ulardan noqonuniy ravishda ariza, ko‘rsatuvlar olishganini, tergov organiga bergan ko‘rsatuvlarini hozirda rad qilishlarini bildirishgan. Biroq sud ularning sudda bergan ko‘rsatuvlarini javobgarlikdan qutulish uchun bildirilgan vajlar deya baholagan.

JIB Sariosiyo tuman sudining hukmi bilan A.Q. Jinoyat kodeksining 168-moddasi 3-qismi “v” bandi va 28,211-moddasi 1-qismida nazarda tutilgan jinoyatlarni sodir etganlikda aybli deb topilgan. Unga 2 yil 1 oy davlat hokimiyati tizimida mansabdor va moddiy javobgarlik lavozimlarida ishlash huquqidan mahrum qilgan holda 3 yil 1 oy muddatga ozodlikdan mahrum qilish jazosi tayinlangan.

Hokim o‘rinbosarining yaqin qarindoshlaridan qaytarib olingan 500 dollar pulni S.D.dan davlat daromadiga undirish belgilangan.

Avvalroq Andijonda tuman hokimi o‘rinbosari 15 ming dollar pora bilan ushlangandi.