Uy-joy bozori jonlandi: bitimlar soni bir oyda 12 foizga ko‘paydi

Iqtisodiy tadqiqotlar va islohotlar markazi oktyabr oyidagi O‘zbekiston uy-joy bozori dinamikasi bo‘yicha yangilangan tahlilni taqdim etdi.

Ma’lumotlarga ko‘ra, oktyabr oyida uy-joy oldi-sotdi bitimlari soni bir oyda 12 foizga oshib, 27,1 mingtaga yetgan. Bu 2023 yil avgustidan buyon qayd etilgan eng yuqori faollik darajasi sifatida baholanmoqda.

Oktyabr oyida uy-joy bozoridagi o‘sish respublika hududlarining deyarli barchasida kuzatilgan.

Eng katta oylik o‘sish Xorazm, Buxoro va Toshkent viloyatlarida qayd etilgan — bu hududlarda uy-joy bitimlari o‘rtacha 26 foizga ko‘paygan.

Surxondaryo va Sirdaryo viloyatlarida esa o‘sish mo‘’tadil bo‘lib, mos ravishda taxminan 2 foiz va 4 foizni tashkil etgan.

Respublika bo‘yicha uy-joy oldi-sotdi bitimlarining taxminan 30 foizi Toshkent shahri hissasiga to‘g‘ri keladi. Oktabr oyida poytaxtda savdo hajmi oylik hisobda 5,3 foizga, yillik hisobda esa 32 foizga oshgan.

Oktyabrda ikkilamchi uy-joy bozorida narxlar o‘sish sur’ati sezilarli ravishda tezlashgan: bir oy ichida 1 kv metr uchun o‘rtacha narx 2,4 foizga oshgan (sentabr oyida bu ko‘rsatkich 0,6 foiz edi), o‘tgan yil oktyabriga nisbatan o‘rtacha narx 7,4 foizga yuqori.

Eng yuqori yillik o‘sish Surxondaryo va Namangan viloyatlarida qayd etilgan — bu yerlarda uy-joy narxlari taxminan 20 foizga qimmatlashgan.

Toshkent shahrida oktyabr oyida ikkilamchi uy-joy bozorida narxlar deyarli o‘zgarmasdan qolib, o‘rtacha o‘sish 0,7 foiz atrofida bo‘lgan.

Yillik hisobda poytaxtda ikkilamchi uy-joy narxlari o‘tgan yil oktyabriga nisbatan 1 foizga pasaygan. Eng sezilarli tushish Mirzo Ulug‘bek va Yashnobod tumanlarida kuzatilib, bu tumanlarda o‘rtacha narxlar taxminan 5 foizga arzonlashgan.

Birlamchi uy-joy bozorida esa aksincha, narxlar o‘sishi qayd etilgan. Oktyabr oyida 1 kv metr uchun o‘rtacha narx yillik hisobda 2,1 foizga oshgan. Eng yuqori o‘sish Bektemir, Yashnobod, Mirobod va Yakkasaroy tumanlarida kuzatilib, bu hududlarda narxlar o‘rtacha 5,5 foizga ko‘tarilgan.

Toshkentda uy-joy ijara bozorida o‘rtacha stavkalar o‘tgan oy darajasida qolib, 1 kv metr uchun 8,5 dollar atrofida shakllandi.

Eng yuqori ijara narxlari poytaxtning markaziy tumanlari — Mirobod, Yakkasaroy va Mirzo Ulug‘bekda saqlanmoqda. Bu hududlarda 1 kv metr uchun o‘rtacha ijara haqi taxminan 10,2 dollarni tashkil etmoqda.

O‘tgan yil oktyabriga nisbatan esa Toshkentda uy-joy ijara narxlari o‘rtacha 1,6 foizga oshgan. Eng katta o‘sish Bektemir, Yashnobod va Sergeli tumanlarida qayd etilgan — bu tumanlarda ijara stavkalari o‘rtacha 9 foizga ko‘tarilgani ma’lum qilingan.