Yo‘llarda chang va chiqindilarga qarshi: ochiq yuk platformalarini yopish talab etilyapti

Ma’lumotga ko‘ra, Yo‘l harakati qoidalarining 162-bandiga muvofiq, avtotransport vositalarining ochiq yuk tashish platformalarida qurilish materiallari, qishloq xo‘jaligi mahsulotlari, sanoat va oziq-ovqat tovarlari, shuningdek, to‘kilib ketishi mumkin bo‘lgan boshqa yuklar tashilayotganda, yuk majburiy tartibda brezent yoki boshqa qalin material bilan yopilgan bo‘lishi shart. Faqat issiq asfalt, yirik gabaritli va og‘ir yuklar bundan mustasno hisoblanadi.

Mutaxassislar ta’kidlashicha, ochiq platformalarda yuklarni yopmasdan tashish yo‘llarning chang va chiqindi bilan ifloslanishiga, yo‘lda harakatlanayotgan boshqa transport vositalari uchun xavf tug‘ilishiga va yo‘l-transport hodisalari yuzaga kelish ehtimolining oshishiga sabab bo‘ladi.

YHXB va Ekologiya qo‘mitasi barcha haydovchilardan yuk tashishda YHQ talablariga qat’iy rioya qilishni, ochiq kuzovda tashilayotgan yuklarni to‘liq yopish orqali yo‘llar sofligi va atrof-muhit uchun mas’uliyat bilan yondashishni so‘ramoqda.