YeChL. Gigantlar jangida «Arsenal» «Bavariya»ni yakson etdi

«Bavariya» o‘zining ojiz nuqtasi bo‘lgan standart vaziyatdan navbatdagi golni o‘tkazib yubordi. Jamoa bungacha bundesligada jami 8 gol o‘tkazgan va shundan 6 tasi standart vaziyatlardan. «Arsenal» uchun esa bu joriy mavsumda burchak zarbalaridan keyin urilgan 10-gol bo‘ldi (tabiiyki, barchanikidan ko‘p).

«Arsenal» shundan keyin «Bavariya»ga bo‘sh zonalar qoldirmadi va pozitsion hujumlar uyushtirishga imkon bermadi, maydonning raqib tomonida kuchli pressing uyushtirdi va to‘p olib qo‘yilgan holatlarda xavfli qarshi hujumlar uyushtirdi. Eze Noyyer to‘p uzoqlashtirishda xatoga yo‘l qo‘ygach, «ikkiga to‘rt» formatida yuzaga kelgan superimkoniyatdan foydalana olmadi.

Natijada londonliklar 2:0 hisobida oldinga chiqib olishi o‘rniga, hisob 1:1 ko‘rinishini oldi. Kimmih dohiyona diagonal pas bilan katta masofani kesib o‘tdi, «kanonirlar»ning sobiq futbolchisi, shu kuni chap qanot hujumida tushgan Gnabri esa o‘ng qanotda paydo bo‘lib, Skellidan ildamroq harakat qildi va bir teginishda to‘pni jarima maydoniga oshirdi, u yerda ochilgan Karl esa darvozani osonlik bilan ishg‘ol qildi. 17 yoshli vunderkind «Emireyts»da bungacha to‘rt turda gol o‘tkazmagan «Arsenal» darvozasini ishg‘ol qildi.

Ko‘p o‘tmay maydon egalari yana bir muammoga duch kelishdi – Leandro Trossar jarohat oldi va 38-daqiqada o‘z o‘rnini Noni Maduekega bo‘shatib berdi. Bo‘lim o‘yin mantig‘iga mos hisob bilan yakunlandi: jamoalar raqib darvozalari sohasiga to‘g‘ri borgan bittadan zarba yo‘llashdi va bu zarbalar golga aylandi. «Arsenal» dastlabki yarim soatda ustunroq edi, ammo bo‘lim oxirlariga borib «Bavariya» vaziyatni tenglashtirdi va masala ikkinchi bo‘limga qoldi.

Tanaffusdan qaytgach mezbonlar darhol oldinga tashlandi va raqib jarima maydonini qamal qilishdi. Saka Kimmihning to‘p yo‘qotishidan keyin ajoyib imkoniyatga ega bo‘ldi, ammo uning zarbasidan keyin Noyyer to‘pni barmoqlari uchi bilan yuqoriga ko‘tarib yuborishga ulgurdi.

Londonliklar yana asosiy quroliga murojaat qilishdi, ikkinchi bo‘lim boshidagi 12 daqiqalikda to‘rt marta burchak zarbasi ijro etildi va ularning har biri xavfli vaziyat bilan yakunlandi, Mikel Merinoning o‘zi uch marta boshda zarba yo‘lladi, ammo unga biroz aniqlik yetishmadi. Moskera va Raysning yaqin masofadan yo‘llagan zarbalarini esa Noyyer qaytardi.

Bu vaqt oralig‘ida mehmonlar ham o‘ng qanotdan xavfli yurishlar amalga oshirishdi, Skelli ikki vaziyatda Olise va Karlni osonlik bilan o‘tkazib yubordi, ammo bu hujumlar golli vaziyatgacha yetib bormadi.

68-daqiqada Arteta boshlang‘ich tarkibdagi xatosini anglab yetdi va Skelli o‘rniga Kalafiorini tushirdi, shuningdek, charchagan Sakani Martinelli almashtirdi, braziliyalik vinger chap qanotga o‘tdi, Madueke o‘zi uchun sevimli bo‘lgan o‘ng qanotga qaytdi. Aynan shu almashtirishlar o‘yin taqdirini hal qildi. Ikki daqiqa o‘tib Rays Upamekanoning noaniq pasidan keyin to‘pni egallab oldi va chaproqda turgan Ezega oshirdi, u esa himoyachilar ortiga ochilgan Kalafiorini o‘z vaqtida to‘p bilan ta’minladi. Italiyalik joker esa to‘pni qanotdan olis ustun tomon yetkazdi, u yerga yetib kelgan Madueke darvoza to‘rini o‘qqa tutdi – 2:1.

Kompani darhol reaksiya ko‘rsatib, holdan toygan Serj Gnabri va Konrad Laymerni maydondan olib, Nikolas Jyekson va Tom Bishofni jangga tashladi. «Bavariya»da hali o‘yinni qutqarish uchun taxminan 20 daqiqa bor edi. Ammo myunxenliklarning bu umidi uzoqqa cho‘zilmadi. Noyyer raqib hujumi vaqtida o‘z uslubida tavakkalchilik qilib, juda oldinga chiqib ketdi, lekin to‘pni egallay olmadi, Martinelli to‘pni bir teginishda uning yonidan o‘tkazdi va oldinga yugurib, bo‘sh darvozani ishg‘ol qildi.

76-daqiqada hozirgi «Arsenal»ga qarshi 1:3 hisobi – amalda o‘yin taqdiri hal degani.

«Bavariya» ikkinchi bo‘limda yo‘qolib qoldi, «Arsenal» kuchli bosim uyushtirdi va ishonchli g‘alabaga erishdi.

Zarbalar bo‘yicha 12:8 (darvoza sohasiga to‘g‘ri borgan zarbalar bo‘yicha 8:2), kutilgan gollar ko‘rsatkichi bo‘yicha 2,72 xG ga 0,69 xG, burchak zarbalari bo‘yicha 6:1 – londonliklar ishonchli tarzda revansh olishdi. Bungacha «Arsenal» roppa-rosa 10 yil davomida rasmiy o‘yinlarda (5) «Bavariya»ni yenga olmayotgandi. Ushbu jamoaga qarshi so‘nggi g‘alaba 2015 yil oktyabrida qayd etilgan (YeChL pley-offida Myunxenda kechgan javob o‘yinida 2:0, lekin birinchi o‘yinda o‘z uyida 1:3 hisobida yutqazgan va safardagi gol qoidasi tufayli turnirni tark etgandi), shundan keyin bir durang va to‘rt mag‘lubiyat bo‘lgan, shundan uch o‘yinda – 1:5 hisoblarida. Aytish mumkinki, qasos olish boshlandi.

«Arsenal» yakkapeshqadamga aylandi: besh o‘yinda besh g‘alaba. Qolganlar esa ochko yo‘qotib bo‘lgan

Londonliklar haqiqiy mashinaga aylanmoqda.

● Faqat «Arsenal» guruh bosqichida 100 foizlik g‘alabaga ega. «Bavariya» 12 ochko bilan qoldi, bungacha ideal o‘yin ko‘rsatib turgan yana bir jamoa «Inter» ham «Atletiko»ga yutqazdi (1:2).

● «Arsenal» yozdan buyon yutqazmayapti. Kuzdagi o‘yinlarda 14 g‘alaba va ikki durang qayd etildi (31 avgust kuni APL 3-turida «Liverpul»ga qarshi mag‘lubiyat yagona bo‘lib qolmoqda).

● «Bavariya» esa bu mavsumda ilk bor yutqazdi. Jamoa bundesligada 10 g‘alaba va bir durang qayd etgandi, YeChLda esa «Arsenal» bilan o‘yinda bu seriya to‘xtadi.

Keyingi turda «Arsenal» Belgiyada «Bryugge» mehmoni bo‘ladi. «Bavariya» «Sporting»ni qabul qiladi.