Bosh prokuratura huzuridagi Departamentning Qashqadaryo viloyati boshqarmasi hamda Davlat xavfsizlik xizmati xodimlari hamkorligida Muborak tumani hududida tezkor tadbir o‘tkazilgan.
Tadbir davomida fuqaro M.K. 1897–1901 yillarda Rossiya imperiyasida chiqarilgan, “Nikolay II” yozuvi tushirilgan 10 dona qadimiy oltin tangani fuqaro Sh.H.ga 71 million so‘mga sotish vaqtida ashyoviy dalillar bilan ushlangan.
O‘tkazilgan ekspertiza xulosalariga ko‘ra, mazkur oltin tangalarning umumiy sof vazni 42,74 grammni tashkil etib, ular qimmatbaho oltin qotishmasidan tayyorlanganligi tasdiqlangan.
Kelib chiqqan holat yuzasidan fuqaroga nisbatan Jinoyat kodeksining 177-moddasi (valuta qimmatliklarini qonunga xilof ravishda olish yoki o‘tkazish) bilan jinoyat ishi qo‘zg‘atilgan. Hozirda tergov harakatlari olib borilmoqda.
