O‘zbekiston Prezidenti administratsiyasi rahbari Saida Mirziyoyeva seshanba kuni kechqurun Toshkentda ekologik vaziyatni yaxshilash bo‘yicha kechiktirib bo‘lmaydigan chora-tadbirlar bo‘yicha maxsus komissiya yig‘ilishini o‘tkazdi. Bu haqda komissiya telegram-kanali xabar berdi.
Ko‘rilayotgan chora-tadbirlar to‘g‘risida Ekologiya va iqlim o‘zgarishi milliy qo‘mitasi raisi Aziz Abduhakimov, Toshkent shahri hokimi Shavkat Umurzoqov va Toshkent viloyati hokimi Zoyir Mirzayev, shuningdek huquqni muhofaza qiluvchi organlar vakillari ma’ruza qilgan.
«Yurtimizdagi havo bilan bog‘liq holat shaxsan davlatimiz rahbarining doimiy nazorati ostida bo‘lib turibdi. Doimiy kuzatuv va ilmiy tahlillar olib borilmoqda, mahalliy mutaxassislar hamda xorijlik ekspertlar ham jalb qilingan, havo ifloslanishi bilan bog‘liq muammoni bartaraf etishga barcha say-harakatlar safarbar qilingan», – deyiladi xabarda.
Saida Mirziyoyeva Maxsus komissiya a’zolari oldiga aniq vazifalarni qo‘ydi: hozir qabul qilinayotgan chora-tadbirlar aniq muddatlarga ega bo‘lishi va ular tizimli bo‘lishi, kelgusi yilda bunday holat takrorlanmasligi kerakligi ta’kidlangan.
Yig‘ilipshda yirik yashil hududlar va bog‘lar tashkil qilish, tabiiy suv havzalari atrofini obodonlashtirish, sun’iy ko‘llar qurish haqida so‘z borgan.
«Taklif etilayotgan keng ko‘lamli chora-tadbirlar majmuasi ko‘rib chiqilgan: yashil o‘simliklarni ekish turlari va joylari, ariqlar tizimini qayta tiklash, issiqxonalar va sanoat korxonalari chiqindilarining oldini olish va havo bilan bog‘liq vaziyatni yaxshilash bo‘yicha boshqa kechiktirib bo‘lmaydigan harakatlar», – deya yozadi yig‘ilishni yoritayotgan bloger Nikita Makarenko.
Prezident administratsiyasi rahbari Toshkent shahri va Toshkent viloyatida yashil maydonlarni saqlash va ko‘paytirish muhim ahamiyatga ega ekanini ta’kidlagan.
Toshkent shahri va Toshkent viloyati hokimlaridan bu borada amalga oshirilayotgan ishlar bo‘yicha muntazam hisobot berib borish talab qilingan.
«Prezidentimiz mendan har kuni bu masala bo‘yicha hisobot so‘rayaptilar. Xalqimizning salomatligi bilan bog‘liq masala bo‘lgan joyda hech birimizning sustkashlikka yo‘l qo‘yishga haqqimiz yo‘q», – degan Saida Shavkatovna.
