Kellog: Tinchlik kelishuvini imzolashga ikkita band to‘sqinlik qilmoqda

Ukrainadagi urushni to‘xtatish bo‘yicha kelishuvni imzolash “rostdan ham juda yaqin”, uning taqdiri esa ikki asosiy masalani hal etishga — Donbassning kelajagi va Zaporijjya atom elektr stansiyasi (ZAES)ga — bog‘liq. Bu haqda shanba, 6 dekabr kuni, Kaliforniya shtatida Ronald Reygan nomi bilan atalgan prezidentlik fondi tomonidan tashkil etilgan forumda AQSh prezidenti Donald Trampning Ukraina bo‘yicha maxsus vakili Kit Kellog ma’lum qildi.

“Agar shu ikki masalani tartibga sola olsak, qolgan hamma narsa juda yengil hal bo‘ladi, deb o‘ylayman”, — dedi Kellog Kaliforniyadagi (Simi-Velli shahri) Ronald Reygan Prezidentlik kutubxonasi va muzeyida nutq so‘zlar ekan. “Biz deyarli maqsadga yetdik… Rostdan ham juda yaqin turibmiz”, — deya ishontirdi Trampning maxsus vakili.

Uning aytishicha, muzokaralar jarayoni “finish chizig‘igacha qolgan so‘nggi 10 metr” bosqichida, bu esa odatda eng qiyin bosqich hisoblanadi.

Kellogning aniqlashicha, to‘liq ko‘lamli urush boshlanganidan beri Rossiya va Ukraina tomonida halok bo‘lgan va yaralanganlar soni jami 2 million nafardan oshgan.

Reuters agentligi eslatganidek, Rossiya hozirgi vaqtda Ukraina hududining 19,2 foizini nazorat qilmoqda. Bunga Qrim, Luxansk viloyatining butun hududi, Donetsk viloyatining 80 foizidan ortiq qismi, Xerson va Zaporijjya viloyatlarining taxminan 75 foizi, shuningdek, Xarkiv, Sumi, Mikolayiv va Dnipropetrovsk viloyatlarining ayrim hududlari kiradi.

AQShning dastlabki takliflariga ko‘ra, ZAESda ish qayta tiklanishi, stansiya esa Atom energiyasi xalqaro agentligi (AEXA) nazorati ostida bo‘lishi kerak. Stansiyada ishlab chiqariladigan elektr energiyasi esa Rossiya va Ukraina o‘rtasida taqsimlanishi nazarda tutilgan.

Ukraina prezidenti Volodimir Zelenskiy 6 dekabr kuni, AQSh prezidentining maxsus elchisi Stiven Uitkoff va Trampning kuyovi Jared Kushner bilan uzoq va “mazmunli” telefon suhbati bo‘lib o‘tganini ma’lum qildi.

Kremlda 5 dekabr kuni Kushner kelishuvni tayyorlash bo‘yicha asosiy ishni olib borishi mumkinligi aytildi. “Agar qandaydir reja qog‘ozda yanada ishlab chiqilaversa va u kelishuvga olib borsa, unda qalamni asosan Kushnerning o‘zi ushlashiga to‘g‘ri keladi”, — dedi Rossiya prezidenti yordamchisi Yuriy Ushakov.

Fransiya prezidenti Emmanuel Makron 8 dekabr kuni Londonda Ukraina rahbari Volodimir Zelenskiy, Buyuk Britaniya bosh vaziri Kir Starmer va Germaniya kansleri Fridrix Mers bilan uchrashadi. Uchrashuv maqsadi — AQSh rahbarligida olib borilayotgan muzokaralarda erishilgan ilgarilashlarni “tanqidiy baholash”. Makron 6 dekabr kuni X ijtimoiy tarmog‘ida London uchrashuvi haqida e’lon qildi.