Rossiya va Xitoy bombardimonchilari Yaponiya atrofida qo‘shma mashg‘ulot o‘tkazdi

9 dekabr kuni Rossiya va Xitoy harbiy-havo kuchlari Yaponiya atrofida qo‘shma patrul parvozlari shaklida mashg‘ulotlar o‘tkazdi. Yaponiya Mudofaa vazirligining ma’lum qilishicha, Pekin bilan keskinlik ortib borayotgan bir paytda, patrul parvozlarini kuzatish uchun Tokio o‘z qiruvchi samolyotlarini havoga ko‘targan.

Reutersʼning yozishicha, Rossiyaning yadroviy qurol tashishga qodir ikki dona Tu-95 strategik bombardimonchisi Yaponiya dengizidan Sharqiy Xitoy dengizi tomonga uchgan. Keyin u yerda Xitoyning ikki dona H-6 bombardimonchisi bilan uchrashgan va Tinch okeani ustida «uzoq masofali qo‘shma parvozni» amalga oshirgan.

#JointPatrol: According to annual cooperation plan between the Chinese and Russian militaries, the two sides conducted their 10th joint strategic air patrol in relevant airspace over the #EastChinaSea and the western part of the #PacificOcean on December 9, 2025.… pic.twitter.com/TiOndvrmRT

— China Military Bugle (@ChinaMilBugle) December 9, 2025

Bombardimonchilar Yaponiya tarkibidagi Okinava va Miyako orollari orasida ham bir necha marta borib-kelib, parvoz qilgan. Bu vaqtda ularga Xitoyning to‘rtta J-16 qiruvchi samolyoti hamrohlik qilgan. Bu orollar orasidagi Miyako bo‘g‘ozi xalqaro suvlarga mansub hudud sifatida tasniflanadi.

Yaponiya dengizi hududida olib borilgan yana bir mashg‘ulotda esa Rossiya harbiy-havo kuchlarining bir dona A-50 erta ogohlantirish samolyoti va ikkita Su-30 qiruvchi samolyoti ishtirok etgan.

Yaponiya mudofaa vaziri Shinjiro Koizumi Rossiya va Xitoyning qo‘shma harakatlarini xavf sifatida baholadi. Mashg‘ulotlar «mamlakatimizga nisbatan kuch namoyishi qilish maqsadini ochiq-oydin ko‘zlagan bo‘lib, bu milliy xavfsizligimiz uchun jiddiy xavotir uyg‘otadi», deb yozdi Shinjiro Koizumi.

Koizumining qo‘shimcha qilishicha, Yaponiya qiruvchi samolyotlari «havo mudofaasi identifikatsiyasi bo‘yicha barcha choralarni qat’iy amalga oshirgan».

Yaponiya bir necha kun oldin ham harbiy keskinlik haqida xabar bergandi. Xususan, Xitoy aviatashuvchisidan havoga ko‘tarilgan qiruvchi samolyotlari bir kun avval Yaponiya harbiy samolyotlariga radarni yo‘naltirgani aytilgan. Lekin rasmiy Pekin bu xabarlarni rad etgan.

Bundan tashqari, Janubiy Koreya harbiylari ham seshanba kuni yetti dona Rossiya samolyoti va ikki dona Xitoy samolyoti ularning havo mudofaasi zonasi hududiga kirganini ma’lum qilgan.

Rossiya Mudofaa vazirligining ma’lum qilishicha, mashg‘ulotlarda «har ikki davlat samolyotlari xalqaro huquq normalariga qat’iy rioya qilgan holda» harakatlangan. «Chet davlatlarning havo hududi buzilishiga yo‘l qo‘yilmadi», deyiladi bayonotda.

Shuningdek, Rossiya tomoni parvozlar 8 soat davom etgani hamda qo‘shma havo patrul amaliyotlaridan keyin barcha samolyotlar o‘z bazaviy aerodromlariga qaytganini ta’kidladi.

«Tadbir harbiy hamkorlik rejasi doirasida o‘tkazildi va uchinchi davlatga qarshi qaratilmagan», — deyiladi mudofaa vazirligi bayonotida.

Nashrning yozishicha, so‘nggi yillarda Xitoy va Rossiya boshqa hududlarda ham harbiy hamkorlikni kengaytirib bormoqda. Xususan, ular Rossiya hududida raketaga qarshi qo‘shma mashg‘ulotlar, shuningdek, Janubiy Xitoy dengizida ham mashg‘ulotlar o‘tkazmoqda.

Xitoyning Yaponiya yaqinidagi harbiy faolligi esa o‘tgan oy – Yaponiya bosh vaziri Sanae Takaichining Tayvan borasidagi bayonotlaridan so‘ng oshdi. O‘shanda Takaichi Tayvanga qarshi amalga oshiriladigan har qanday harbiy harakat, agar u Yaponiya xavfsizligiga ham tahdid solsa, Tokio bunga javob qaytarishi mumkinligini aytgandi.