Toshkentning ikki tumanida elektr ta’minotida uzilish ro‘y berdi

Yunusobod va Mirzo Ulug‘bek tumanlarida 11 dekabr tongida “Botanika” podstansiyasiga ulangan bir nechta kabel tarmoqlarida nosozlik yuzaga kelishi oqibatida 6,2 mingdan ortiq iste’molchi vaqtincha elektr ta’minotisiz qoldi. Energetiklar ayrim tarmoqlarda uzilishni bartaraf etishga erishdi, qolgan qismlarda ishlar davom etmoqda.

Toshkent shahrining Yunusobod va Mirzo Ulug‘bek tumanlarida 11 dekabr tongida elektr ta’minotida uzilish kuzatildi, 6,2 mingdan ortiq iste’molchi vaqtincha svetsiz qoldi.

Energetika vazirligi ma’lumotiga ko‘ra, soat 05:53 da “Botanika” podstansiyasidan chiquvchi “Astronomiya-1,2”, “L-Bosmaxona” va “L-Karamurt” kabel tarmoqlarida nosozlik yuzaga kelgan. Shuning natijasida ushbu tarmoqlarga ulangan iste’molchilar elektr ta’minotidan uzilgan.

Soat 09:06 da “Astronomicheskaya-2” kabel tarmog‘idagi nosozlik bartaraf etildi va 3 mingdan ortiq iste’molchining elektr ta’minoti qayta tiklandi. Hozirgi vaqtda energetiklar qolgan kabel tarmoqlaridagi nosozlikni bartaraf etish, barcha iste’molchilarni elektr energiyasi bilan to‘liq ta’minlash bo‘yicha ish olib bormoqda.