Kambag‘al oilalarga o‘rmon fondida ekilgan daraxtlar uchun subsidiya beriladi

Hukumat qarori bilan “Kambag‘al oila a’zolariga o‘rmon fondi yerlarida ekilgan daraxtlar uchun subsidiya ajratish tartibi to‘g‘risida”gi nizom tasdiqlandi. Nizomga ko‘ra, o‘rmon fondi yerlarida ekilgan va parvarishlangan har 100 ta daraxt uchun BHMning 1 baravari miqdorida subsidiya ajratiladi.

Foto: Reuters

Nizomda belgilanishicha, talabgor o‘rmon xo‘jaligi tashkiloti tomonidan tayinlangan mas’ul xodim — murabbiyning tavsiya va ko‘rsatmalari asosida tanlangan maydonda yerni tayyorlaydi, daraxt ko‘chatlarini bir mavsum davomida ekadi hamda parvarishlaydi.

Ekilgan ko‘chatlar murabbiy va tuman (shahar) ekologiya bo‘limi bilan birgalikda joyiga chiqqan holda dalolatnoma va fotohisobot asosida qabul qilib olinadi.

Shundan so‘ng tuman (shahar) ekologiya bo‘limi tomonidan “Ekofaol fuqaro” platformasida har bir talabgor uchun shaxsiy kabinet ochilib, unga ekilgan daraxt ko‘chatlari haqidagi ma’lumotlar kiritib boriladi. Kiritilgan ma’lumotlar 5 ish kuni ichida tasdiqlanadi yoki tasdiqlash rad etiladi.

Tartibga ko‘ra, tuman (shahar) ekologiya bo‘limi ekilgan ko‘chatlar soniga mutanosib ravishda subsidiyaning 50 foizini talabgorga to‘lab berish uchun Qoraqalpog‘iston Respublikasi Ekologiya va iqlim o‘zgarishi qo‘mitasi, viloyatlar va Toshkent shahar Ekologiya va iqlim o‘zgarishi bosh boshqarmalariga talabnoma yuboradi. Ekologiya boshqarmalari esa subsidiya mablag‘larini 5 ish kuni mobaynida talabgorning bank kartasiga o‘tkazib beradi.