Prezident: ayolni muammosi bilan yolg‘iz qoldirishga hech kimning haqqi yo‘q

Prezident xotin-qizlarning qadr-qimmatini joyiga qo‘yish va farzandlarni himoya qilish qadimdan erkaklar uchun sha’n va g‘urur masalasi bo‘lib kelganini qayd etdi. Biroq jamiyatda ayollar va bolalarning turli zo‘ravonliklarga uchrayotgani xalqimizning buyuk tarix, yuksak ma’naviyat va oilani muqaddas deb biladigan qadriyatlariga aslo yarashmasligi ta’kidlandi.

Davlat rahbari oilaviy zo‘ravonlik faqat oilaning ichki ishi emasligi, bu butun jamiyatga daxldor muammo ekanini alohida urg‘uladi. Shu bilan birga, “ayolni o‘z muammosi bilan yolg‘iz tashlab qo‘yishga hech kimning haqqi yo‘q”, deya ta’kidladi.

Ma’lum qilinishicha, ayollar va bolalarga nisbatan zo‘ravonlikning oldini olish bo‘yicha respublika muvofiqlashtiruvchi kengashga barcha davlat idoralari va keng jamoatchilikni safarbar qilgan holda salbiy holatlarga barham berish bo‘yicha samarali ishlaydigan tizim yaratish vazifasi qo‘yildi.

Shuningdek, prezident parlament hamda fuqarolik jamiyati institutlarini ham ushbu jarayonlarda faol ishtirok etishga chaqirdi.