Telegram orqali giyohvandlik savdosi bilan shug‘ullangan shaxslar ushlandi

Bosh prokuratura huzuridagi Departamentning Qashqadaryo viloyati boshqarmasi va DXX xodimlari hamkorligida o‘tkazilgan “Xavfsiz va sog‘lom yurt” tezkor-profilaktik tadbirlari davomida internet ijtimoiy tarmog‘i orqali giyohvandlik vositalari savdosi bilan shug‘ullanganlikda gumon qilingan fuqarolar qo‘lga olindi.

Foto: Prokuratura departamenti

Ma’lum qilinishicha, fuqarolar S.N. va A.E. “Telegram” tarmog‘ida kanal-bot tashkil etib, ushbu kanal orqali giyohvandlik vositalari savdosi bilan shug‘ullanib kelganliklari aniqlangan.

Tadbir davomida ularning yashash xonadonidan 7,9 gramm “marixuana” hamda 22,79 gramm “mefedron” sintetik giyohvandlik vositalari ashyoviy dalil sifatida olingan.

Mazkur holat yuzasidan Jinoyat kodeksining 25, 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) bilan jinoyat ishi qo‘zg‘atilib, ish materiallari tergovga tegishliligi bo‘yicha yuborilgan.