Yevropa Ittifoqining tashqi ishlar va xavfsizlik siyosati bo‘yicha oliy vakili Kaya Kallas Venesuela suvereniteti hurmat qilinishi kerakligini ta’kidlab, AQSh tomonidan Nikolas Maduro qo‘lga olinganidan keyin mamlakatda demokratiyaga tinch o‘tishni qo‘llab-quvvatlashga chaqirdi. Bu Kallasning yakshanba, 4 yanvar kuni kechqurun e’lon qilingan bayonoti — Yevropa Ittifoqining rasmiy pozitsiyasidan kelib chiqadi.
Bayonotda YeI fikriga ko‘ra “Nikolas Maduro demokratik yo‘l bilan saylangan prezident sifatida legitimlikka ega emas”ligi aytilgan. Shu bilan birga, YeI Venesuelada demokratiyaga tinch o‘tish tarafdori ekanini bildirib, bu jarayon “venesuelaliklarning o‘zlari tomonidan — mamlakat suverenitetiga hurmat saqlangan holda” amalga oshirilishi kerakligini ta’kidlaydi. YeI diplomatiyasi rahbariga ko‘ra, Venesuela xalqi irodasini hurmat qilish — hozirgi inqirozni hal etishning yagona yo‘li.
Kallas “qanday sharoit bo‘lishidan qat’i nazar, xalqaro huquq tamoyillariga rioya qilinishi shart” ekanini qayd etib, BMT Xavfsizlik Kengashining doimiy a’zosi sifatida ushbu tamoyillarga amal qilishda AQShning alohida mas’uliyati borligiga ishora qildi.
Bayonot matniga ko‘ra, Yevropa Ittifoqi transmilliy uyushgan jinoyatchilik va giyohvand moddalarning noqonuniy aylanmasiga qarshi kurashni zarur deb hisoblaydi, biroq bu faqat “hududiy yaxlitlik va suverenitet tamoyillariga to‘liq rioya qilingan taqdirdagina” amalga oshirilishi mumkin.
