Aydar–Arnasoyda tabiatga salkam 400 mln so‘m zarar yetkazgan fuqarolar ushlandi

Joriy yilning 2 yanvar kuni IIV huzuridagi Qo‘riqlash departamentining Aydar–Arnasoy ko‘llar tizimini muhofaza qilish boshqarmasi xodimlari ko‘lning nazorat hududida tungi vaqtda harakatlanayotgan “Lasetti” rusumli transport vositasini to‘xtatib ko‘zdan kechirgan. Tekshiruv davomida avtomobil yukxonasidan ko‘ldan noqonuniy ravishda tutilgan jami 344 dona 4 xil turdagi baliq mahsulotlari borligi aniqlangan.

Shu kuni boshqarma xodimlari tomonidan ko‘l hududida qayiq va to‘r yordamida baliq mahsulotlarini noqonuniy ravishda ovlayotgan 2 nafar fuqaro ham qo‘lga olingan. Dastlabki o‘rganishlar jarayonida ularning oldida 40 dona sudak turidagi baliq mahsuloti borligi ma’lum bo‘lgan.

Hozirda holatlar bo‘yicha tegishli hujjatlar rasmiylashtirilib, ko‘rib chiqish uchun sud organlariga yuborish choralari ko‘rilmoqda. Ma’lumot uchun, ovlangan baliq mahsulotlari hududga xizmat ko‘rsatuvchi MChJga topshirilgan.

Noqonuniy baliq ovlash natijasida tabiatga keltirilgan taxminiy zarar 387 mln so‘mni tashkil qiladi.