Dorixonalarda spirt o‘rniga loson taklif etilayotgani aniqlandi

Raqobat qo‘mitasi tomonidan dorixonalarda «sirli mijoz» tadbiri o‘tkazildi, deya xabar berdi qo‘mita axborot xizmati. Bunga iste’molchi spirt mahsuloti so‘raganda uning o‘rniga dorixona xodimi tomonidan loson taklif etilayotgani haqidagi murojaatlar sabab bo‘lgan.

«O‘rganishlarda 20 dan ortiq dorixonalar qamrab olindi va shundan taxminan 25 foizida spirt so‘ralganda uning o‘rniga loson berilgani aniqlandi. Shu bilan birga, dori vositalarini ishlab chiqarishda GDP sertifikatlari joriy etilib, sifat nazorati kuchaytirilgan davrda ayrim spirt ishlab chiqaruvchilar litsenziya olmagan va spirt o‘rniga loson ishlab chiqarishni boshlagan. Mazkur holat yuzasidan iste’molchilarga to‘liq ma’lumot berilmagani ularni chalg‘itishga olib kelgan», deyiladi qo‘mita xabarida.

Ma’lumki, 70 foizli tibbiy spirt sog‘liqni saqlash sohasida ya’ni

• inʼeksiyalar oldidan teriga ishlov berish;
• asbob-uskunalarni sterilizatsiya qilish;
• yaralarni davolash;
• jarrohlik amaliyotlarida qo‘llanadi.

Loson esa tarkibida spirt miqdori past bo‘lgan kosmetik mahsulot hisoblanadi va asosan:

• terini tozalash va ortiqcha yog‘lanishni kamaytirish,
• kosmetika qoldiqlarini bartaraf etishga mo‘ljallangan.

Shu bois spirt o‘rniga loson taklif etilishi kutilgan natijani bermasligi va iste’molchilar sog‘lig‘iga zarar yetkazishi mumkin.