Farg‘ona vodiysidagi kuchli qor sabab bir nechta reyslar muqobil aerodromlarga yo‘naltirildi

Noqulay ob-havo (kuchli qor yog‘ishi) tufayli Andijon va Namangan yo‘nalishidagi ayrim reyslar xavfsizlik nuqtayi nazaridan O‘sh, Samarqand va Toshkentdagi muqobil aerodromlarga yo‘naltirildi. Keyinchalik Namangan xalqaro aeroporti odatiy rejimda ishlayotgani ma’lum qilindi.

Foto: Ijtimoiy tarmoqlar

Farg‘ona vodiysida kuzatilgan kuchli qor yog‘ishi sabab bir nechta aviareyslar muqobil aerodromlarga yo‘naltirildi.

Ma’lum qilinishicha, S7 Airlines’ning Irkutsk—Andijon yo‘nalishidagi S76311 reysi ekipaji O‘shdagi muqobil aerodromga qo‘nishga qaror qilgan (mahalliy vaqt bilan 00:01 da qo‘ngan).

Air Samarkand’ning Jidda—Namangan yo‘nalishidagi 9S5010 reysi Samarqanddagi muqobil aerodromga yo‘naltirilgan (mahalliy vaqt bilan 00:27 da qo‘ngan). Shuningdek, Ural Airlines’ning Yekaterinburg—Namangan yo‘nalishidagi U62963 reysi ham Samarqanddagi muqobil aerodromga qo‘nishga qaror qilgan (mahalliy vaqt bilan 00:40 da qo‘ngan).

Uzbekistan Airways’ning Samara—Namangan yo‘nalishidagi HY9806 reysi ekipaji Toshkentdagi muqobil aeroportga yo‘nalishni o‘zgartirgan (mahalliy vaqt bilan 04:11 da qo‘ngan). FlyOne aviakompaniyasining Madina—Namangan yo‘nalishidagi 7Q4452 reysi ham Toshkentdagi muqobil aeroportga yo‘naltirilgan (mahalliy vaqt bilan 06:05 da qo‘ngan).

Hozirgi vaqtda Namangan xalqaro aeroporti odatiy rejimda ishlayotgani qayd etildi.