O‘zbek diplomatlari Pensilvaniyadagi vaqtincha saqlash markaziga tashrif buyurdi

Xorijdagi O‘zbekiston fuqarolarining huquq va qonuniy manfaatlarini himoya qilish maqsadida AQShdagi o‘zbekistonlik diplomatlar Pensilvaniya shtatining Moshannon Volley okrugida joylashgan chet el fuqarolarini vaqtincha saqlash markaziga tashrif buyurdi, deb xabar bermoqda “Dunyo” AA.

Diplomatlar markazda saqlanayotgan O‘zbekiston fuqarolari bilan konsullik suhbatlari o‘tkazib, ularni saqlash va ovqatlantirish sharoitlari, salomatligi hamda boshqa maishiy jihatlarini o‘rgandi. Shuningdek, vatandoshlarga konsullik va huquqiy masalalar bo‘yicha tegishli tushuntirishlar berildi.

Uchrashuvlarda markazda saqlanayotgan fuqarolarning aksariyati ularni O‘zbekistonga qaytarish bo‘yicha sudning yakuniy qarori qabul qilinganini bildirgan. Qayd etilishicha, bu jarayon uchun zarur hujjatlar tayyorligi hamda O‘zbekistonning konsullik muassasalari tomonidan rasmiylashtirilgani ma’lum qilingan. Vatandoshlar diplomatlarning tashrifini o‘zlarining O‘zbekiston himoyasida ekanini tasdiqlovchi muhim qadam sifatida baholab, ko‘rsatilayotgan e’tibor uchun minnatdorlik bildirgan.

Shu bilan birga, ayrim fuqarolar bo‘yicha sud jarayonlari hali davom etayotgani aytildi. Ushbu shaxslar oilasini sog‘inganini bildirib, yaqinlari bag‘riga tezroq qaytishi uchun amaliy yordam so‘ragan.

O‘zbekistonning AQShdagi vakolatxonasi o‘z vakolatlari doirasida fuqarolarni O‘zbekistonga qaytarish masalalari bo‘yicha xorijiy tomonlar bilan tegishli muzokaralar o‘tkazishga, shuningdek zarur hujjatlarni tayyorlashda amaliy yordam ko‘rsatishga tayyorligini ma’lum qildi.

Ma’lumotda AQShning immigratsiya siyosatidagi so‘nggi o‘zgarishlarni hisobga olgan holda, xorijdagi O‘zbekiston fuqarolariga yana bir bor o‘zlari bo‘lib turgan mamlakat hududida qonuniy yashash, mahalliy qonunchilikka qat’iy rioya qilish va noqonuniy xatti-harakatlardan tiyilish tavsiya etildi.

Zarurat tug‘ilganda O‘zbekistonning AQShdagi vakolatxonalari bilan quyidagi aloqa vositalari orqali bog‘lanish mumkin: O‘zbekistonning Vashington shahridagi elchixonasi (Konsullik bo‘limi) - telefon: +1 (202) 887-5300. Elektron pochta: [email protected]. O‘zbekistonning Nyu-York shahridagi Bosh konsulxonasi: telefon: +1 (212) 754-7403. Elektron pochta: [email protected].