Samarqand viloyati maktab ta’limi boshqarmasi boshlig‘i «Alvon yelkanlar» mojarosi ortidan ishdan ketdi

Rossiyaning Sankt-Peterburg shahridagi bayramga iqtidorli o‘quvchilar o‘rniga amaldorlarning qarindoshlari yuborilgani bilan bog‘liq holat yuzasidan xizmat tekshiruvi o‘tkazilib, Samarqand viloyati maktabgacha va maktab ta’limi boshqarmasi rahbari Muzaffar Hamdamov lavozimidan ozod etildi. Bu ma’lumotni Korrupsiyaga qarshi kurashish agentligi Kun.uz’ga tasdiqladi.

Tekshiruv davomida mas’ullar «Davlat fuqarolik xizmati to‘g‘risida»gi va «Manfaatlar to‘qnashuvi to‘g‘risida»gi qonunlar, shuningdek, davlat xizmatchilari odob-axloqi qoidalari talablariga zid harakat qilgani, qator qo‘pol xato va kamchiliklarga yo‘l qo‘ygani aniqlangan.

Shuningdek, boshqarma boshlig‘i o‘rinbosari A.B., buxgalteriya hisobi va davlat xaridlari shu’basi yetakchi mutaxassisi O.M., pedagoglarning bilim va malakalarini baholashni tashkil etish shu’basi bosh metodisti O.M., o‘quvchilar bilimini baholash va tahlil qilish shu’basi boshlig‘i G. S., o‘quvchilar bilimini baholash va tahlil qilish shu’basi metodisti I.X.ga nisbatan intizomiy jazo choralarini qo‘llash bo‘yicha vazirlikka taklif kiritilgan.

Masala vazirlikning Odob-axloq komissiyasida muhokama qilinib, bunday holatlarning oldini olish choralari belgilangan.

Ma’lumot uchun, Muzaffar Hamdamov 2019 yildan Paxtachi tumani hokimi lavozimida ishlagan, 2025 yil fevralida Samarqand viloyati MMTB boshlig‘i lavozimiga o‘tkazilgandi.

Eslatib o‘tamiz, 2025 yil iyun oyida Sankt-Peterburgdagi «Alvon yelkanlar» nomli bayramga («Alyye parusa») Samarqand viloyati maktabgacha va maktab ta’limi boshqarmasining ayrim mansabdor shaxslari a’lochi o‘quvchilar o‘rniga o‘z farzandi, jiyani va yaqinlarini yuborgani aniqlangandi.

Shundan so‘ng Korrupsiyaga qarshi kurashish agentligi holat yuzasidan tekshiruv boshladi.

O‘rganishlar natijasida xorij safari uchun mahalliy budjetdan ajratilgan 95 mln so‘m mablag‘dan bir qismi – 28 mln so‘m uch nafar o‘quvchining ota-onasi tomonidan budjetga qaytarilgani ma’lum qilingan, shuningdek, vazirlikka tanish-bilishchilikka yo‘l qo‘ygan rasmiylarni ishdan bo‘shatish haqida taqdimnoma ham kiritilgandi.