Urushning uchinchi kuni. Eron yana arab davlatlariga zarba berdi va muzokaralardan bosh tortdi

Trampning fikricha, Eronga qarshi operatsiya «taxminan to‘rt hafta yoki undan ham kamroq vaqt oladi» – u Britaniyaning Daily Mail nashriga bergan intervyusida shu gaplarni aytgan. Shu bilan birga, AQSh prezidenti Amerika armiyasida hali yana yo‘qotishlar bo‘lishiga tayyor. Bir kun oldin Markaziy qo‘mondonlik «Epik g‘azab» nomini olgan ushbu operatsiya doirasidagi janglarda amerikalik uch nafar harbiy xizmatchi halok bo‘lgani va besh nafari jiddiy yaralangani haqida xabar bergandi. «Bizda uch yo‘qotish bor, ammo yana bo‘lishi mumkin. Ammo yakunda bu dunyo uchun ajoyib kelishuv bo‘ladi», – degan Tramp NBC News uchun intervyusida.

Germaniya, Fransiya va Buyuk Britaniya rahbarlari Eron Fors ko‘rfazi mamlakatlariga palapartish raketa zarbalaridan «g‘azablangani»ni ma’lum qildi hamda Eronning raketa va dronlarni uchirish qobiliyatini yo‘q qilish uchun zarur va mutanosib mudofaa choralari bilan tahdid qildi.

«Hizbulloh» Isroilga hujum qildi. TSAHAL Livan bo‘ylab zarba yo‘lladi

«Hizbulloh» 2 martga o‘tar kechasi raketa va dronlar bilan Isroil shimoli bo‘ylab hujum uyushtirdi. Ushbu guruh bayonotida bu hujum Eron oliy rahbari Ali Xominaiyning o‘ldirilishi uchun qasos ekani bildirilgan. Raketalardan bittasi «tutib olingan», yana bir nechasi ochiq joyga qulagan, jabrlanganlar yo‘q. Bunga javoban Isroil mudofaa armiyasi Livan bo‘ylab zarba yo‘lladi. Harbiylarga ko‘ra, «Hizbulloh» shtab-kvartirasi va infratuzilmalari hujum nishoni bo‘lgan.

Livan bo‘ylab zarba berilishidan oldin isroillik harbiylar ushbu mamlakat janubida yashovchi aholini evakuatsiya zarurati haqida ogohlantirgan. Ko‘p o‘tmay Isroil armiyasi bosh shtabi boshlig‘i Eyal Zamir «Hizbulloh»ga qarshi hujum amaliyoti boshlanganini e’lon qildi. Uning so‘zlariga ko‘ra, Isroil «ko‘p frontlik» ssenariyga tayyor. «Bizning xavfsizligimizga tahdid soluvchi har qanday dushman katta to‘lov qiladi», – degan Zamir.

Livan sog‘liqni saqlash vazirligi Isroil zarbalari oqibatida 31 kishi halok bo‘lib, yana 149 kishi jarohatlanganini ma’lum qildi. Al-Arabiya va Al-Hadath telekanallari manbalari «Hizbulloh» siyosiy qanoti rahbari Muhammad Raad halok bo‘lganini xabar qilishgan.

Urush neft narxiga qanday ta’sir qilmoqda?

Bozorlar ochilishida Brent markali neftning bir barreli 80 dollardan yuqori narxda sotildi. Uning narxi 13 foizga (82 dollargacha) oshdi – bu 2024 yil yozidan beri eng yuqori ko‘rsatkich. Savdo boshlanganidan ko‘p o‘tmay, narx 79 dollar darajasida shakllandi. 

Citigroup tahlilchilari yaqin haftada Brent narxi 80–90 dollar oralig‘ida bo‘lishini kutmoqda. 

Morgan Stanley ikkinchi chorak uchun prognozni 62,5 dollardan 80 dollargacha oshirdi. Goldman Sachs tanker harakati jiddiy izdan chiqqani, ammo hozircha ishlab chiqarish va eksport infratuzilmasiga zarar tasdiqlanmaganini ma’lum qildi. Wood Mackenzie esa agar navigatsiya tez orada tiklanmasa, narxlar 100 dollardan ham oshishi mumkinligidan ogohlantirgan.

Neft bozoridagi siljishlar boshqa aktivlarga ham ta’sir ko‘rsatdi. Xususan, oltin narxi avvaliga keskin ko‘tarilib, keyin qisman pasaydi. Global aksiyalar indeksi savdo boshida tushib ketdi, keyin yo‘qotishlarning bir qismini qopladi.

Birlashgan Arab Amirliklari Qimmatli qog‘ozlar va tovarlar boshqarmasi fond bozorlari dushanba va seshanba kunlari yopiq bo‘lishini ma’lum qildi. «Boshqarma mintaqadagi vaziyat rivojini kuzatishda davom etadi va vaziyatni doimiy ravishda baholab boradi, zarur hollarda qo‘shimcha choralar ko‘radi», – deyiladi bayonotda. Reuters qayd etishicha, Abu Dhabi Securities Exchange va Dubai Financial Market birjalarida mintaqaning faqat eng qimmat kompaniyalari aksiyalari sotilmoqda.