Dohada 500 nafardan ortiq o‘zbekistonlik mehmonxonalarda qolmoqda

“Dunyo” AA xabar berishicha, elchixona xodimlari Dohada vaqtincha qolib ketgan fuqarolar bilan doimiy aloqada bo‘lib, ularning ehtiyojlarini o‘rganmoqda.

Qayd etilishicha, 3 mart kuni diplomatlar La Villa va OYYO Hotel mehmonxonalarida bo‘lib, u yerda vaqtincha yashayotgan vatandoshlarning shaxsiy ma’lumotlari asosida ro‘yxat shakllantirildi.

Shuningdek, elchixona “Vatandosh” jamoat fondi bilan hamkorlikda mehmonxonalarda joylashgan ayrim muhtoj fuqarolarga iftorlik taomlarini yetkazib berdi.

Ma’lum qilinishicha, tibbiy yordamga muhtoj fuqarolar esa Hamad shifoxonasiga olib borilgan.

Bundan tashqari, Dohada yo‘l-transport hodisasi oqibatida vafot etgan fuqaroni dafn etish uchun tegishli hujjatlarni rasmiylashtirish jarayoniga ko‘mak berilgan hamda Qatarning mas’ul idoralari bilan hamkorlikda janoza marosimi o‘tkazilgan.

Ayni paytda Qatar havo hududi yopiqligicha qolayotgani ma’lum qilindi.