Germaniyaning Kiyevdagi elchixonasi Ukraina Mustaqillik kuni yaqinlashayotgani munosabati bilan mamlakatda bo‘lib turgan Germaniya fuqarolari uchun xavfsizlik va safarlarga oid tavsiyalarini yangiladi. Bu haqda diplomatik vakolatxona 14-avgust kuni ma’lum qildi.
Elchixona ogohlantirishicha, 24-avgust kuni va shu sana atrofida Rossiya tomonidan Ukraina energetika infratuzilmasi hamda yirik transport uzellariga havo hujumlari kuchayishi ehtimolini istisno qilib bo‘lmaydi.
Diplomatik vakolatxona, ayniqsa, temiryo‘l transportidan foydalanish bilan bog‘liq xavflarga e’tibor qaratgan. Elchixona ma’lumotiga ko‘ra, Ukraina temiryo‘l infratuzilmasi hamon havo zarbalarining nishonlaridan biri bo‘lib qolmoqda.
Rossiya kuchlari avval ham nafaqat temiryo‘l stansiyalari va infratuzilma ob’yektlariga, balki harakatlanayotgan poyezdlarga ham havodan zarba bergan.
Xususan, 13-avgust kuni Odessa yaqinida yo‘lovchi poyezdiga qilingan hujum oqibatida mashinist va uning yordamchisi halok bo‘lgan.
Iyun oyida esa Rossiya Ukrainaning turli hududlaridagi uchta temiryo‘l lokomotiviga zarba bergan. Shuningdek, Sumi viloyatida temiryo‘l stansiyalari, signalizatsiya ob’yektlari va elektr nimstansiyalari ham hujumga uchragan.
Germaniyaning Ukrainadagi yangi elchisi ish boshladi
Ayni paytda Germaniyaning Ukrainadagi diplomatik vakolatxonasiga yangi rahbar tayinlangan. Boris Ruge Germaniyaning Ukrainadagi yangi elchisi sifatida o‘z vazifasini bajarishga kirishdi.
Ruge 2023-yil sentyabridan NATO bosh kotibining siyosiy masalalar va xavfsizlik siyosati bo‘yicha yordamchisi lavozimida ishlab kelgan.
U bundan avval Myunxen xavfsizlik konferensiyasi raisi o‘rinbosari bo‘lgan. Shuningdek, 2014–2016-yillarda Germaniyaning Saudiya Arabistonidagi elchisi lavozimida faoliyat yuritgan.
Boris Ruge Ukrainada Germaniya elchisi sifatida 2025-yil sentyabridan buyon ishlab kelgan Xayko Toms o‘rnini egalladi.
