Erondagi qizlar maktabiga kim havo zarbasi berdi?

4 mart kuni Oq uy ma’muriyatining yuqori martabali mulozimlari urushning birinchi kunida Erondagi qizlar boshlang‘ich maktabiga berilgan havo zarbasi ortida AQSh turgan-turmaganini hali ham o‘rganayotganini ma’lum qildi.

Eron davlat OAVlari va sog‘liqni saqlash rasmiylariga ko‘ra, ushbu zarba Amerika-Isroil harbiy kampaniyasining hozirgacha bo‘lgan eng halokatli hujumlaridan biri bo‘ldi. Hujum oqibatida kamida 175 kishi halok bo‘ldi, ularning aksariyati bolalar.

Maktab nega nishonga olingani yoki qaysi davlat qurolli kuchlari unga qarata o‘t ochgani hozircha noma’lum.

Oq uy matbuot kotibi Karolin Levitt chorshanba kuni tushdan keyin o‘tkazilgan brifingda Amerika Qo‘shma Shtatlari maktabga havo zarbasi berganmi yoki yo‘qmi degan savolga: «Biz bilganimizcha yo‘q. Urush vazirligi bu masalani o‘rganmoqda», deb javob berdi.

New York Times'ning yozishicha, bir necha daqiqa o‘tgach, bu AQSh zarbasi emasligiga biror dalil bormi yoki Isroilning ushbu hujumda ishtiroki bor-yo‘qligi yuzasidan biron-bir baholash o‘tkazildimi, deb qayta so‘ralgan. «Yana qaytaraman, Urush vazirligi ayni damda ushbu masalani surishtirmoqda», deya javob berdi Oq uy so‘zchisi.

Nashrning yozishicha, chorshanba kuni Pentagondagi brifingda Mudofaa vaziri Pit Hegsetdan ham ushbu zarba haqida so‘raldi.

«Aytishim mumkin bo‘lgan yagona narsa — biz buni o‘rganyapmiz. Biz, albatta, hech qachon fuqarolik obektlarini nishonga olmaymiz, lekin biz vaziyatni ko‘rib chiqyapmiz va surishtiruv olib boryapmiz», dedi Hegset.

Zarba 28 fevral – urushning birinchi kunida sodir bo‘lgandi. Oradan 4 kun o‘tganini hisobga olsak, aybdor kimligi haqida hozircha aniq ma’lumot bo‘lishi kerak emasmi, degan savolga Hegset: «Biz buni o‘rganyapmiz», degan javobini takrorladi.

Zarba berilgan «Shajarayi Toyyiba» maktabi Eron janubidagi kichik Minob shaharchasida joylashgan. Seshanba kuni shaharcha ko‘chalari minglab motamsarolar bilan to‘ldi. Ishchilar boshlang‘ich maktabdan taxminan besh mil uzoqlikdagi qabristonda qator qilib qabrlar qazishgan.

BMT agentligi YuNeSKO maktabda «o‘quvchilarning o‘ldirilishi» xalqaro humanitar huquq doirasida maktablarga beriladigan himoyaning «qo‘pol ravishda buzilishi» ekanligini yozdi.

Levittdan brifingda ushbu hujum haqida so‘ralganda, u «Amerika Qo‘shma Shtatlari, o‘z xalqini o‘ldiradigan, bolalarni qatl qiladigan va o‘z fuqarolarini yo‘q qilgan yovuz Eron rejimidan farqli o‘laroq, tinch aholini nishonga olmaydi», dedi.

Uning so‘zlariga ko‘ra, Eron rejimi «targ‘ibotdan juda samarali foydalanadi» va Oq uy brifing zalidagi ko‘plab jurnalistlar «o‘sha propagandaga uchib qolishgan». «Shuning uchun, tinch aholini nishonga olish masalasida AQShga barmoq bilan ishora qilishdan ehtiyot bo‘lishingizni so‘rardim. Chunki bu bizning qurolli kuchlarimiz qiladigan ish emas», - deya qo‘shimcha qildi u.