Shavkat Mirziyoyev: Mahalla - ona yurtimizning go‘zal timsoli

Davlat rahbari ta’kidlaganidek, mahalla tushunchasi har bir yurtdoshimiz uchun muqaddas qadriyat bo‘lib, u xalqimizning birdamligi, bag‘rikengligi va o‘zaro mehr-oqibatini o‘zida mujassam etadi.

Prezident “Mahallani rivojlantirish va jamiyatni yuksaltirish yili” doirasida bu borada keng ko‘lamli dastur va rejalar amalga oshirilayotganini qayd etdi.

Shavkat Mirziyoyev mahallada tinchlik va totuvlikni mustahkamlash, ijtimoiy muammolarni joyida hal etish, ezgulik va adolatni qaror toptirishda otaxon va onaxonlar, “mahalla yettiligi” a’zolari hamda faol fuqarolarning ishtiroki ayniqsa muhim ekanini ta’kidladi.

Davlat rahbari ushbu jarayonlarda mahalla tizimi vakillariga katta ishonch bildirib, ularning jamiyat taraqqiyotidagi o‘rnini yuksak baholadi.

Shuningdek, prezident ertaga nishonlanadigan Mahalla tizimi xodimlari kuni munosabati bilan barcha mahalla raislari va faollarini, butun yurtdoshlarni samimiy tabriklab, ularga yangi yutuq va muvaffaqiyatlar tiladi.

Qayd etilganidek, mahalla instituti mamlakatda ijtimoiy barqarorlikni ta’minlash, aholi farovonligini oshirish va jamiyatni yanada birlashtirishda muhim o‘rin tutadi.