2025 yilda eng ko‘p xonadon Namanganda foydalanishga topshirildi

2025 yil yakunlariga ko‘ra, O‘zbekistonda foydalanishga topshirilgan xonadonlar soni 69,1 mingtani tashkil etdi. Hududlar orasida eng yuqori ko‘rsatkich Namangan viloyatida qayd etildi.

Foto: advantour.com

Milliy statistika qo‘mitasi ma’lumotlariga ko‘ra, 2025 yilda O‘zbekiston bo‘yicha jami 69,1 mingta xonadon foydalanishga topshirilgan.

Bu ko‘rsatkich 2024 yilga nisbatan 2,4 mingtaga oshgan.

Hududlar kesimida eng ko‘p xonadon Namangan viloyatida foydalanishga topshirilgan bo‘lib, ularning soni 10,8 mingtani tashkil etgan.

Keyingi o‘rinlarda Toshkent viloyati 6,7 mingta, Surxondaryo viloyati 6,1 mingta, Farg‘ona viloyati, Xorazm viloyati va Toshkent shahri esa 5,9 mingtadan xonadon bilan qayd etilgan.

Shuningdek, Buxoro viloyatida 5,6 mingta, Andijon viloyatida 4,8 mingta, Qoraqalpog‘iston Respublikasida 4,6 mingta, Qashqadaryo viloyatida 4,1 mingta, Samarqand viloyatida 3,5 mingta xonadon foydalanishga topshirilgan.

Eng past ko‘rsatkichlar Jizzax va Navoiy viloyatlarida — 2 mingtadan, Sirdaryo viloyatida esa 0,6 mingtani tashkil etgan.