O‘zbekiston musulmonlari idorasi Islom sivilizatsiyasi markaziga ko‘chib o‘tdi

Joriy yil Ramazon hayiti arafasida Toshkentda megaloyiha – O‘zbekistondagi Islom sivilizatsiyasi markazi ochildi. Markazda yirik muzey va Qur’on zalidan tashqari, kutubxona hamda ayrim diniy-ma’rifiy tashkilotlarning ofisi uchun alohida joy ajratilgan.

Xususan, O‘zbekiston musulmonlari idorasi markaziy apparati o‘z faoliyatini Islom sivilizatsiyasi markazi binosida davom ettira boshladi.

Diniy idora matbuot xizmatining ma’lum qilishicha, markazning Xorazm portali mahobatli eshigidan kirib, liftdan ikkinchi qavatga ko‘tarilganda katta foye va diniy idora hududiga kirish mumkin.

«Ichkariga kirishingiz bilanoq Qur’oni karim oyatlari, prezidentimiz so‘zlaridan iqtiboslar, idora tarixi, muftiylar haqidagi ma’lumotlar bilan tanishasiz. Yo‘lakning ikki tomonida rais o‘rinbosarlari va bo‘limlar uchun ajratilgan xonalar joylashgan», deyiladi idora xabarida.

Ma’lum qilinishicha, markazdagi «keng va yorug‘ xonalar, zamonaviy jihozlar soha xodimlarining ish samaradorligini yanada oshirmoqda».

Shuningdek, idora ixtiyorida kichik va katta majlislar zali bo‘lib, ular zamonaviy texnologiyalar bilan ta’minlangan. «Jonli efirga mo‘ljallangan kameralar va to‘liq Wi-Fi zonasi mavjud. Zaldagi barcha texnikalar bir maromda ishlashi mas’ullar tomonidan nazorat qilib turiladi. Diniy idora joylashgan qismga yondosh kutubxonadan ham faoliyat mobaynida unumli foydalanish mumkin».

Bunga qadar O‘zbekiston musulmonlari idorasi uzoq yillar davomida markazning yonida – «Hazrati Imom» masjidi oldidagi ikki qavatli binoda (Qorasaroy ko‘chasi 47-uyda) joylashgan edi.

Diniy idoraning ma’lum qilishicha, eski manzildagi binoda – Fatvo markazi, Haj va Umra markazi, Qur’on va tajvidni o‘rgatish, moliyaviy nazorat va tahlil, xo‘jalik, axborot-tahlil bo‘limlari, buxgalteriya, studiya, faxriylar kengashi hamda fuqarolarni qabul qilish kabi yo‘nalishlar o‘z faoliyatini davom ettirmoqda.

Kun.uz nashri O‘zbekistondagi Islom sivilizatsiyasi markazi va uning faoliyati haqida, shuningdek, Markazda joylashgan Qur’oni karim zalidan fotoreportajlar taqdim qilgan edi.