Франция президенти Эммануэл Макроннинг Ветнамга ташрифи чоғида рафиқаси томонидан итариб юборилгани ҳазил бўлиб, оилавий жанжал натижаси эмас, дея маълум қилди 26 май, душанба куни Франция раҳбари. Аввалроқ Елисей саройи вакили воқеани «президент ва унинг рафиқасининг сафар бошланишидан олдинги ҳазили» деб таърифлаганди.
Бир кун аввал Франция президентининг самолёти Ветнамга қўнди. Кейинроқ AP ахборот агентлиги француз биринчи хонимининг қўллари Макроннинг юзини итариб ташлагани акс этган кадрларни эълон қилди. Ўзининг суратга олинаётганини англаган давлат раҳбари жилмайиб, қўлини силкитган. Эр-хотин бирга самолёт зинапоясидан пастга тушишган, бироқ Брижит Макрон эрининг қўлини олишдан бош тортган.
Воқеа ҳақида Россия ТИВ расмий вакили Мария Захарова изоҳ берди. «Дунё президент самолёти Ханойга етиб келганида Макрон рафиқасидан тарсаки егани акс этган кадрларни кўрди. Лекин энг қизиғи бу эмас, балки Елисей саройининг бу сафар яна бир эммануэл-гейт учун нимани ўйлаб топишидадир», деб ёзди у Telegram-каналида.
