Oltita qurilish kompaniyasi reklama qonunchiligini buzgani uchun jarimaga tortildi

Bir qator qurilish kompaniyalari reklama to‘g‘risidagi qonun hujjatlarini buzganligi uchun moliyaviy jarimaga tortildi, deya xabar berdi Raqobat qo‘mitasi.

Olib borilgan o‘rganishlarda “Humo Avenue” MChJ, “Story Dom Siyob” MChJ, “Aziya Makon City” MChJ, “Aziza Credo Max” MChJ, “Shoxsaroy Enter Group” MChJ va “Qorasuv Avenue” MChJ qurilish korxonalarining qurilish majmualari elektron ro‘yxatga kiritilmaganligi, biroq ushbu turar joy majmualari ijtimoiy tarmoqlarda reklama qilinayotganligi aniqlangan.

2020 yildagi prezident qarori bilan tasdiqlangan nizomga asosan, quruvchilar turar joy majmualarini Ulush kiritish asosida qurish uchun mablag‘larni jalb etuvchi quruvchilarning elektron ro‘yxatiga kiritmasdan turib reklama qilishi taqiqlanadi.

“Yuqoridagilarga asosan, qo‘mita maxsus komissiyasi tomonidan “Humo Avenue” MChJ, “Story Dom Siyob” MChJ, “Aziya Makon City” MChJ, “Aziza Credo Max” MChJ, “Shoxsaroy Enter Group” MChJ va “Qorasuv Avenue” MChJlar qonun buzilish holatlariga yo‘l qo‘ygan deb topilib, ularga nisbatan belgilangan tartibda moliyaviy jarima qo‘llash haqida qaror qabul qilindi. Shuningdek, qonunbuzilishi holatini to‘xtatish va kelgusida takrorlamaslik yuzasidan ko‘rsatma berildi” deyiladi qo‘mita xabarida.