1 iyundan boshlab jarima maydonchasidan mashinani onlayn olib ketish mumkin bo‘ladi

Yangi xizmatning ishlash tartibi Vazirlar Mahkamasining 2026 yil 28 apreldagi qarori bilan tasdiqlangan. 31 mayga qadar Ichki ishlar vazirligi xizmatni ishga tushirish uchun axborot tizimlarini integratsiya qiladi. Haydovchi amaldagi tartibda og‘zaki yoki yozma ravishda ariza berish imkoniyatini saqlab qoladi.

Mashinani jarima maydonchasiga qachon olib ketishadi?

Mast holatda rul oldiga o‘tirsa, haydovchilik guvohnomasini yoki ro‘yxatdan o‘tkazish hujjatini uyda unutib qoldirsa, normadan ortiq tonirovka qo‘ydirsa, YHTH joyini tark etsa yoki yo‘lda xuliganlik qilsa, haydovchining mashinasi jarima maydonchasiga olib ketiladi. To‘liq asoslar ro‘yxati Ma’muriy javobgarlik to‘g‘risidagi kodeksning 291-moddasi 1-qismi «a» bandida belgilangan.

Ariza qayerda topshiriladi?

1 iyundan boshlab ariza topshirish uchun uchta yo‘l mavjud bo‘ladi:

An’anaviy usul ham saqlanib qolinadi. Haydovchi avvalgidek YHXXga kelib, og‘zaki yoki yozma shaklda murojaat qilishi mumkin.

Arizada qanday ma’lumotlarni ko‘rsatish kerak?

Reglamentda anketa shakli quyidagicha bo’ladi:

Jismoniy shaxs uchun: ism-familiyasi, tug‘ilgan sanasi va joyi, pasport yoki ID-kartaning seriyasi va raqami, yashash manzili, JShShIR, telefon raqami, elektron pochta (mavjud bo‘lsa).

Yuridik shaxs uchun: tashkilot nomi, STIR, manzili, telefon raqami, elektron pochta (mavjud bo‘lsa).

Murojaatning o‘zi haqida: transport vositasining davlat raqami belgisi, boshqarish huquqini beruvchi hujjatlar (haydovchilik guvohnomasi, transport vositasini ro‘yxatdan o‘tkazish to‘g‘risidagi guvohnoma, sug‘urta polisi, ishonchnoma, yo‘l varaqasi va boshqalar), qo‘shimcha hujjatlar (masalan, avtomobilni qabul qilish-topshirish dalolatnomasi).

Anketa to‘ldirilgach, ariza beruvchi ma’lumotlarning to‘g‘riligini tekshiradi va ularni OneID orqali tasdiqlaydi.

Ko‘rib chiqish qancha vaqt oladi?

Reglamentda har bir bosqich uchun aniq muddatlar belgilangan. Ko‘rib chiqish davri ariza YHXXga kelib tushgan va ro‘yxatga olingan paytdan boshlab hisoblanadi.

Agar ariza kechqurun, dam olish yoki bayram kunida topshirilsa, muddat keyingi ish kunidan boshlab hisoblanadi.

Arizada xatolar bo‘lsa-chi?

Agar avtomatik tekshiruv ariza beruvchining ma’lumotlarida xatoliklarni yoki hujjatlarda nomuvofiqliklarni aniqlasa, YHXX bir ish kuni ichida MyGov.uz yoki ilova orqali xabarnoma yuboradi. Haydovchida tuzatishlar kiritish uchun besh ish kuni vaqt bo‘ladi.

Agar ushbu muddat ichida xatolar bartaraf etilmasa, ariza rad etiladi. Rad etish to‘g‘risidagi xabarnoma o‘sha platforma orqali avtomatik tarzda keladi. Haydovchi arizani qaytadan topshirishiga to‘g‘ri keladi.

Mashinani olib chiqish uchun ruxsatnoma qachon beriladi?

YHXX ikki holda ruxsatnoma beradi:

● transport vositasini ushlab turish sabablari bartaraf etilganda;

● ma’muriy huquqbuzarlik to‘g‘risidagi ish bo‘yicha qonuniy qaror qabul qilinganda.

Tekshiruvdan so‘ng YHXX my.gov.uz yoki mobil ilova orqali mashinani olib chiqish mumkinligi haqida xabarnoma yuboradi. Muddati bir ish kuni. Mazkur xabarnoma bilan haydovchi mashinani jarima maydonchasidan olib ketadi.

Agar ushlab turish sabablari bartaraf etilmagan yoki huquqbuzarlik to‘g‘risidagi ish hali ko‘rib chiqilmagan bo‘lsa, haydovchiga bu haqda alohida xabarnoma keladi. Bu ham bir ish kuni ichida amalga oshiriladi.

Ruxsatnoma berish rad etilsa, nima qilish kerak?

Reglamentning 4-bobida ariza beruvchining shikoyat qilish huquqiga oid normalar mavjud. Bu quyidagi tartibda bo‘ladi:

· YHXXning yuqori turuvchi organiga;

· sudga.

Agar sud ma’muriy qarorni noqonuniy deb topsa, ariza beruvchi yetkazilgan zararni qoplash talabi bilan sudga murojaat qilishi mumkin. YHXX xodimlarining harakatlari yoki harakatsizligi ustidan shikoyatlar qonunchilikda belgilangan tartibda ko‘rib chiqiladi.