AQSh va Eron yana zarbalar almashdi

AQSh Markaziy qo‘mondonligining ma’lum qilishicha yakshanba kuni Eronning Ko‘rfaz sohilidagi obektlariga zarba bergan. Bu hujumlar «xalqaro suv hududlarida parvoz qilayotgan AQShning MQ-1 dronini urib tushirishni o‘z ichiga olgan Eronning harakatlariga» javoban amalga oshirilgan.

«AQSh qiruvchi samolyotlari mintaqaviy suvlardan o‘tayotgan kemalarga aniq xavf tug‘dirgan Eron havo mudofaasi tizimlari, yerdagi boshqaruv stansiyasi va ikkita kamikadze dronlarni yo‘q qilish orqali tezkorlik bilan javob qaytardi», deyiladi CENTCOM bayonotida. Shuningdek, qo‘mondonlik amaldagi otashkesim davrida ham AQSh aktivlari va manfaatlarini himoya qilishni davom ettirishini qo‘shimcha qilgan.

Eron Islom inqilobi muhofizlari korpusi Eron janubiga hujum qilish uchun foydalanilgan AQSh aviabazasini nishonga olganini ma’lum qildi. Biroq aynan qaysi baza ekanligiga aniqlik kiritmadi.

Reutersʼning yozishicha, Quvayt rasmiylari dushanba kuni havo mudofaasi tizimlari raketa va dron hujumlarini qaytargani hamda butun mamlakat bo‘ylab xavf sirenalari yangraganini xabar qilgan. Bu mamlakatda AQShning yirik harbiy bazasi joylashgan.

AQSh va Eron o‘rtasida aprel oyi boshida o‘t ochishni to‘xtatish kelishuvi kuchga kirgandi. Shundan beri yanada mustahkamroq bitimga erishishga qaratilgan muzokaralar cho‘zilmoqda. Shu bilan birga AQSh va Eron vaqti-vaqti bilan o‘zaro zarbalar almashib kelmoqda. Shunga o‘xshash holat o‘tgan payshanba kuni ham sodir bo‘lgan va har ikki tomon bir-birini ayblagandi.

AQSh va Isroil tomonidan 28 fevralda boshlangan urush oqibatida asosan Eron va Livanda minglab odamlar halok bo‘ldi. Shuningdek, Eron tomonidan Ho‘rmuz bo‘g‘ozining amalda yopib qo‘yilishi energiya resurslari narxini oshirib, global iqtisodiy qiyinchiliklarga sabab bo‘ldi.

AQSh prezidenti Donald Tramp ushbu urushdan ko‘zlangan asosiy maqsad — Eronning yuqori darajada boyitilgan uran yordamida yadro qurolini ishlab chiqishiga yo‘l qo‘ymaslik ekanini aytdi. Tehron esa bunday rejalari borligini muttasil ravishda inkor etib keladi.

Ikki tomon boshqa bir qancha masalalarda ham kelisha olmayapti. Jumladan, Tehronning sanksiyalarni bekor qilish va xorijiy banklarda muzlatib qo‘yilgan o‘n milliardlab dollarlik Eron neft daromadlarini qaytarish haqidagi talablari shular jumlasidandir.

Isroilning Livanda Eron tomonidan qo‘llab-quvvatlanadigan «Hizbulloh» harakati bilan olib borayotgan urushi yana bir yirik to‘siq hisoblanadi. Isroil bosh vaziri Binyamin Netanyahu 31 may kuni «Hizbulloh» qurolli guruhiga qarshi kurashda qo‘shinlarga Livan ichkarisiga yanada chuqurroq kirib borishni buyurganini ma’lum qildi.