O‘zbekistonda xalqaro raqamli texnologiyalar markazi tashkil etilmoqda

O‘zbekistonda raqamli iqtisodiyot va yuqori texnologiyalar sohasini jadal rivojlantirish maqsadida maxsus huquqiy rejim asosida faoliyat yuritadigan xalqaro raqamli texnologiyalar markazi tashkil etilmoqda. Bu haqda prezident Shavkat Mirziyoyev investorlar bilan muloqot chog‘ida ma’lum qildi.

Foto: Prezident matbuot xizmati

Davlat rahbari mamlakatda «yashil» energetika va sun’iy intellekt sohalaridagi hamkorlikni yanada kengaytirish ustuvor vazifalardan biri ekanini ta’kidladi. Shu munosabat bilan investorlarga quyosh va shamol elektr stansiyalari qurish, energiya saqlash tizimlarini rivojlantirish, elektr tarmoqlarini modernizatsiya qilish hamda «yashil» energiya asosida ishlaydigan data-markazlar barpo etish bo‘yicha qator takliflar bildirildi.

Prezidentning qayd etishicha, sun’iy intellektni rivojlantirish bugungi kunning eng muhim talablaridan biri hisoblanadi. Xorijiy ekspertlar baholashicha, kelgusi besh yil ichida mazkur sohada O‘zbekiston iqtisodiyoti uchun kamida 10 milliard dollarlik qo‘shimcha qiymat yaratilishi mumkin.

«Asosiy vazifamiz sun’iy intellekt orqali aholining barcha qatlamlari hayotini yaxshilash, undan ta’lim, davlat xizmatlari va biznes jarayonlarida keng foydalanishdan iborat», — dedi davlat rahbari.

Shuningdek, Qoraqalpog‘iston Respublikasida sun’iy intellekt loyihalari va data-markazlar uchun maxsus zona tashkil etilgani ma’lum qilindi. Ushbu hududda faoliyat yurituvchi investorlar 2040 yilga qadar barcha turdagi soliqlar va bojxona to‘lovlaridan ozod etiladi.

Bundan tashqari, maxsus zonada yo‘l, elektr va suv infratuzilmasi davlat mablag‘lari hisobidan qurib berilishi, elektr energiyasi uchun esa 1 kilovatt-soatga 5 sent miqdorida imtiyozli tarif qo‘llanishi belgilangan.

Prezident investorlarni raqamli texnologiyalar, sun’iy intellekt va «yashil» energetika sohalaridagi istiqbolli loyihalarda faol ishtirok etishga chaqirdi.