Kun.uz avvalroq Toshkent shahridagi yangi avtobus bekatlari haqida aholi vakillari fikrini yoritgan edi. Tahririyat navbatdagi materialida bekatlarni o‘rnatayotgan kompaniya va poytaxt rasmiylari izohini taqdim etadi.
Ma’lum qilinishicha, bekatlarni o‘rnatishga davlat mablag‘lari ishlatilmayapti, barcha xarajatlar bu huquqni auksionda yutib olgan kompaniya hisobidan amalga oshirilyapti.
Tadbirkor kiritgan investitsiyasini bekatlarda reklama joylash va vending apparatlari orqali chiqarib olishni ko‘zlagan.
“Byudjyetdan pul olmayapmiz”
Yangi bekatlarni qurish va rekonstruksiya qilish ishlari ochiq elektron auksionlar orqali amalga oshirilmoqda. Auksionlarda 230 ta bekat bo‘yicha ijara huquqini “Ewi Snacks” MChJ yutib olgan.
Korxona bu bekatlarni namunaviy loyiha asosida rekonstruksiya qilish, kamida 70 tasiga vending apparati o‘rnatish va yana 230 ta ijtimoiy bekat (chetroq joylarda) qurish majburiyatini olgan.
“Xususiy tadbirkor sifatida hammasini o‘zimizning mablag‘imiz hisobidan qilamiz. Byudjyetdan yoki davlat jamg‘armalaridan pul olmaymiz”, – dedi Ewi Snacks vakili Jahongir Abdurahmonov.
Uning so‘zlariga ko‘ra, kompaniya bekatlarni tashkil etish ishlarini bosqichma-bosqich olib boryapti: avvaliga bekatlarning konstruksiyalari o‘rnatib chiqilgan, shundan keyin perronlar, o‘rindiqlar, chiqindi qutilari kabilar qo‘yib borilyapti. Hozircha 200 dan ortiq bekatlar yarim tayyor holatda, ya’ni ulardagi eng muhim oltita element o‘rnatib bo‘lingan.
Tadbirkor Kun.uz bilan suhbatda bekat elementlarining narxini aytib o‘tdi. Unga ko‘ra, perron – 24 mln so‘m, konstruksiya – 21 mln so‘m, laytbokslar (reklama monitori) – 8-9 mln so‘m, elektron tablo – 5-5,5 mln so‘m, kameralar – 2-4 mln so‘m, o‘rindiq – 2 mln so‘m, elektr tarmog‘i tortish ayrim joylarda 12 mln so‘mgacha, vending apparati esa 36–40 mln so‘m turadi. Bundan tashqari, internet va SOS tugmasi faol ishlab turishi uchun har oy abonent to‘lovlari to‘lanadi.
“E’tirozlar inobatga olinadi”
Qayd etish kerak, amalda poytaxtdagi ko‘plab eski bekatlar talabga javob bermaydigan perron ustidagi metall soyabon va o‘rindiqdan iborat bo‘lib, ulardan tashqari faqat chiqindi qutisi va avtobuslar grafigi ko‘rsatilgan metall lavha bor xolos.
Yangi bekatlar esa imkoniyati cheklangan shaxslarga moslashtirilgan perron, avtobus kelish vaqtini ko‘rsatadigan elektron tablo, xavf tugmasi, kuzatuv kamerasi va vending apparatlari kabi qulayliklarga ega bo‘ladi. Bekatni ijaraga olgan korxona bekatning tozaligi va qutilardagi chiqindilarni olib ketishni ham ta’minlaydi.
Yo‘l harakatini tashkil etish markazi xodimi Olloyor Norbo‘tayevning aytishicha, ijtimoiy tarmoqlarda bildirilayotgan fikr va takliflarni inobatga olgan holda, ko‘proq soya tushishi va yog‘ingarchilikdan yaxshiroq pana qilishi uchun yangi bekatlarning tom qismini kengaytirish, bekat tomida issiqlikni qaytaradigan materiallardan foydalanish va tadbirkorning tashabbusi bilan aholi gavjum ayrim bekatlarda ventilyatorlar o‘rnatish reja qilinmoqda.
Uning qo‘shimcha qilishicha, ba’zi holatlarda bekat dizaynini tubdan o‘zgartirish imkonsiz: masalan, Farg‘ona yo‘li ko‘chasida bekatlar asosiy yo‘l va qo‘shimcha yo‘l o‘rtasida joylashgan bo‘lib, u yerdagi mavjud sharoit bekatga soya tushishini ta’minlash imkonini bermaydi.
Toshkent shahar transport boshqarmasi boshlig‘i Mirakbar Ikromovning so‘zlariga ko‘ra, poytaxtda 2871 ta avtobus bekati mavjud bo‘lib, shundan 753 tasi do‘konli bekatlar, 700 tadan ortig‘i esa yetarlicha jihozlanmagan – 2026-2027 yillarda ularni qayta rekonstruksiya qilish reja qilingan.
2026 yil dekabriga qadar jami 496 ta bekat foydalanishga topshirilishi kutilyapti. Shundan 230 tasi to‘liq zamonaviy, qolganlari esa soddaroq ijtimoiy bekatlar bo‘ladi.
Mas’ullar aholi tanqidlari loyiha uchun foydali ekanini, jamoatchilikning o‘rinli takliflari asosida bekatlar dizayni va qulayliklari takomillashtirilayotganini bildirdi.
