Ijtimoiy himoya milliy agentligi joriy yilning avgust oyidan ayrim oilalar uchun bolalar nafaqasi va moddiy yordam to‘lovlari to‘xtatilishi mumkinligini bildirdi.
Qayd etilishicha, amaldagi tartibga ko‘ra, “Kambag‘al oila” toifasiga kiritilgan oilalarga 2026 yilning fevral oyida tayinlangan bolalar nafaqasi hamda moddiy yordam to‘lovlarining 6 oylik muddati avgust oyida yakunlanadi. Ushbu to‘lov ajratilishi davom etishi yoki to‘xtatilishida oilaning mehnatga layoqatli a’zolari bandligi asosiy mezon hisoblanadi.
Agentlikning bildirishicha, agar oiladagi mehnatga layoqatli shaxs oxirgi 6 oy davomida rasmiy ishlamagan yoki bandlik xizmatlari tomonidan taklif qilingan mos ishni ikki marta yoki undan ko‘p rad etgan bo‘lsa, nafaqa to‘lovi keyingi oydan (ya’ni avgustdan) boshlab to‘xtatiladi.
To‘lovlarning uzluksizligini ta’minlash uchun oiladagi mehnatga layoqatli shaxs quyidagilardan biri orqali rasmiy bandligini ko‘rsatishi zarur:
Rasmiy ishga joylashish (mehnat shartnomasi asosida);
Yakka tartibdagi tadbirkor (YaTT) sifatida ro‘yxatdan o‘tib, soliqlarni o‘z vaqtida to‘lash;
O‘zini o‘zi band qilgan shaxs sifatida ro‘yxatdan o‘tib, belgilangan ijtimoiy soliqni to‘liq to‘lash.
Ta’kidlanishicha, bolalar nafaqasi va moddiy yordam davlat tomonidan haqiqatan ham ko‘makka muhtoj oilalarni qo‘llab-quvvatlash uchun beriladi.
«Shuning uchun mehnatga layoqatli oila a’zolarining rasmiy bandligini ta’minlash muhim hisoblanadi”, deyiladi xabarda.
