AQSh-Eron urushi
AQSh prezidenti Donald Tramp dushanba kuni Eron bilan muzokaralarning yangi bosqichi bo‘lib o‘tishini ma’lum qildi.
Avvalroq Tramp Eron va Yaqin Sharqning boshqa mamlakatlari bo‘g‘ozni «zudlik bilan» ochishga olib keladigan kelishuvni yakunlash uchun vaqt so‘raganini, ammo Tehron «tezda KELIShUVGA erishishi» kerakligini yozgandi.
Tramp yakshanba kuni jurnalistlarga muzokaralar dushanba kuni tushdan keyin boshlanishini aytdi. Biroq u uchrashuv qayerda bo‘lib o‘tishi va unda kimlar ishtirok etishi haqida ma’lumot bermadi.
Eronga kelishuvga erishish uchun oxirgi muddat qo‘yilganmi degan savolga Tramp javob berishdan bosh tortdi.
«Kelishuvga erishishni afzal ko‘ramanmi? Men odamlarni o‘ldirish niyatida emasman, chunki [urushda] ko‘plab odamlar o‘ladi. Biz esa buni xohlamaymiz», deb javob berdi Tramp.
Tramp fevral oyi oxirida Isroil bilan birgalikda boshlagan Eronga qarshi urushni kuchaytirish bilan bir necha bor tahdid qilgan. So‘nggi kunlardagi keskinlik va hujumlar Fors ko‘rfazidan Qizil dengizgacha, hatto Misrdagi O‘rta Yer dengizi inshootigacha kengayib ketgandi.
Yakshanba kuni Eron tashqi ishlar vaziri Abbos Araqchi diplomatik sa’y-harakatlarni muhokama qilish uchun o‘zining saudiyalik hamkasbi shahzoda Faysal va Pokiston armiyasi rahbari Asim Munir bilan muloqot qilgan.
Eronning rasmiy axborot agentligi Tehron va Omon o‘rtasida Ho‘rmuz bo‘g‘ozi bo‘yicha muzokaralar yakuniy bosqichda ekanini xabar qildi.
Isroil energetika vaziri, Netanyahuning xavfsizlik kengashi a’zosi Eli Koen esa mintaqada sodir bo‘layotgan barcha jarayonlar bo‘yicha AQSh bilan xavfsizlik va razvedka muvofiqlashuvi mavjudligini ta’kidladi. Uning ta’kidlashicha, kelishuv bo‘lgan taqdirda ham, Eron shartlarga rioya qilmasa, Isroil «shu yerda bo‘ladi».
Moskvada terakt va urush harakatlari
1-avgust kuni kechqurun Moskvada sodir etilgan terakt oqibatida kamida uch kishi halok bo‘ldi va 21 kishi jarohatlandi. Portlash Moskvaning Kudrinskiy maydonidagi osmono‘par binoda joylashgan italyan restorani yaqinida yuz bergan.
Rossiya Milliy aksilterror qo‘mitasining bildirishicha, qo‘lbola portlovchi qurilma ko‘tarib olgan noma’lum ayol restoranga kirishga uringan, biroq xavfsizlik xodimi tomonidan to‘xtatib qolingan. Shundan so‘ng yuz bergan portlash oqibatida ayol, qorovul va restoranning bir mijozi voqea joyida halok bo‘lgan.
Mahalliy OAVga ko‘ra, shifoxonaga yetkazilgan ikki kishi ham jarohatlari oqibatida vafot etgan, natijada qurbonlar soni besh kishiga yetdi. Yana olti kishining ahvoli hamon og‘irligicha qolmoqda.
Moskva meri Sergey Sobyanin yakshanba kuni qurbonlarning oila a’zolariga hamdardlik bildirdi va aybdorlar jazolanishini ta’kidladi. Rasmiylar halok bo‘lganlar, jarohatlanganlar yoki gumondorlarning ism-shariflarini e’lon qilmadi.
Urushni yorituvchi kanallar ma’lumotlariga ko‘ra, hujum nishoni - Rossiya Havo-kosmik kuchlari bosh qo‘mondoni, general-polkovnik Aleksandr Chayko bo‘lgan bo‘lishi mumkin. Bundan tashqari, restoranda Rossiya FXXning yuqori lavozimli rasmiylari va boshqa mansabdorlar ham bo‘lgan.
«Kommersant» gazetasi bomba ko‘tarib kelgan ayol bu haqda umuman bilmagan bo‘lishi va portlovchi qurilma masofadan harakatga keltirilgani ehtimolini ilgari surdi.
Rossiya hukumati Kiyevni ayblab kelayotgan qator suiqasdlardan so‘ng, bu yil yuqori martabali harbiy amaldorlarni yaxshiroq himoya qilishga va’da bergandi. Rossiyalik harbiy blogerlar hech qanday dalil keltirmasdan, bu hujumda ham Ukrainani aybladi. Rasmiy Kiyev voqea yuzasidan izoh bermadi.
Dam olish kunlari Rossiya-Ukraina o‘rtasida harbiy harakatlar ham davom etdi. Yakshanba kuni Rossiya hududlariga qilingan Ukrainaning yuzlab dronlari hujumlari oqibatida kamida sakkiz kishi halok bo‘ldi.
Samarada ham WB omborlari yondirildi. Shuningdek, Ukraina kuchlari Saratov va Kalugadagi neft zavodiga, Engelsdagi aviabazasiga hujum qilgan.
O‘z navbatida, Rossiya kuchlari Ukrainaning Nikolayev portidagi infratuzilmalarga va Qora dengizda harbiy ta’minot olib ketayotgan kemaga zarba bergan.
Marokashlik migrantlar qaytarilmoqda
O‘tgan haftada Marokashdan Ispaniyaning Seuta anklaviga ommaviy ravishda yopirilib kirgan muhojirlar orasida qurbonlar soni kamida 72 kishiga yetdi. Rasmiylarning ma’lum qilishicha, Shimoliy Afrika qirg‘oqlari bo‘ylab yana besh kishining jasadi topilgan.
Ispaniya hukumatining Seutadagi vakili Migel Peresga ko‘ra, yana 1000 dan ortiq kishiga tibbiy xizmat ko‘rsatilgan. Anklavdagi vaziyat sezilarli darajada yaxshilangan, ammo odatiy hayot tarzini to‘liq tiklash uchun hali ko‘p ish qilinishi kerak, dedi rasmiy.
Ayrim muhojirlar to‘lqinlarni qaytarish uchun qo‘yilgan to‘siqlar va chegara panjarasiga chiqishga urinish paytida cho‘kib ketgan, boshqalari esa tiqilinchda bosib qolingan. Ularning ko‘pchiligi iqtisodiy qiyinchiliklar tufayli hamda ijtimoiy tarmoqlardagi mish-mishlarga ishonib migratsiyaga qaror qilgan.
Ispaniya politsiya va armiya patrullarini kuchaytirdi. Shanba kuni Seuta qirg‘oqlari yaqinida 500 metrlik suzuvchi to‘siq o‘rnatildi.
Yevropa Ittifoqining Afrika bilan quruqlikdagi chegarasida payshanba kuni boshlangan misli ko‘rilmagan oqim davomida 50 000 dan ortiq odam Seutaga o‘tdi. Bu butun Yevropa Ittifoqi bo‘ylab xavotir uyg‘otdi. Ispaniya rasmiylariga ko‘ra, 2 kun ichida 48 000 dan ortiq muhojir Marokashga qaytarilgan va dam olish kunlarida bu raqam yana oshgan.
Marokash ichki ishlar vazirligi muhojirlarning bunday yopirilib kelishiga - odam savdosi tarmoqlari va «muhojirlarni zudlik bilan ortga qaytarishni taqiqlovchi Ispaniya qarori»ning noto‘g‘ri talqin qilinishini sabab qilib ko‘rsatdi. Shuningdek, Marokash noqonuniy migratsiyaga qarshi kurashish niyatida qat’iy ekani ta’kidlanib, migratsiyani boshqarish mas’uliyatini birgalikda ko‘tarishga chaqirildi.
Fojiali dam olish kunlari
Avgust oyining dastlabki 2 kuni - dam olish kunlari dunyo bo‘ylab juda notinch o‘tdi. Bir qancha mamlakatlarda halokatlar va fojiali hodisalar qayd etildi.
Xususan, Peruda 1-avgust kuni Grand Caravan samolyoti qulab tushdi. Oqibatda bortdagi barcha 13 kishi halok bo‘ldi. Qurbonlarning 11 nafari yevropalik sayyohlar va 2 nafari mahalliy uchuvchilar bo‘lgan.
Samolyot Peruning mashhur arxeologik zonasi uzra sayyohlik parvozini amalga oshirayotgan bo‘lgan. Aloqa uzilishidan oldin ekipaj a’zolari mexanik nosozlik haqida xabar berishga ulgurgan, samolyot dalaga qulab, yonib ketgan.
2-avgust kuni Pokistonning Svat vodiysidagi siyosiy namoyish vaqtida terakt sodir bo‘ldi. Hududiy politsiya mahkamasi yonida yuz bergan xudkushlik portlashida 14 kishi halok bo‘ldi va 20 dan ortiq odam yaralandi.
Mahalliy OAVlarga ko‘ra, xudkush terrorchi politsiya tekshiruvidan qochish uchun o‘zini namoyishchilar ichida portlatgan. Hujum uchun mas’uliyatni «Tahriki Toliboni Pokiston» guruhi o‘z bo‘yniga oldi.
2-avgust kuni Indoneziyaning Madura oroli yaqinida paromda chiqqan yong‘in oqibatida esa 5 kishi halok bo‘ldi, 41 kishi bedarak yo‘qoldi. Bortda jami 271 yo‘lovchi va ekipaj a’zolari bo‘lgan, ularning 225 nafari qutqarib olindi.
Parom Makassar tomon ketayotganida olov ichida qolgan. Ko‘plab yo‘lovchilar yong‘indan qochish uchun o‘zlarini dengizga otgan. Hozirda yong‘inning kelib chiqish sabablari yuzasidan surishtiruv olib borilmoqda.
Yakshanba kuni yana bir fojia – o‘rmon yong‘inlari bilan kurashayotgan Gretsiyada yuz berdi. Afina yaqinidagi yong‘inlarni o‘chirishda qatnashayotgan ikki vertolyot havoda to‘qnashib ketdi. Oqibatda 2 kishi halok bo‘ldi - biri daniyalik uchuvchi, ikkinchisi gretsiyalik koordinator. Ikkinchi vertolyotdagilar omon qolgan.
Ma’lum qilinishicha, operatsiya davomida Bell rusumli ikki vertolyot havoda bir-biriga juda yaqin kelib qolgan, natijada ularning parraklari to‘qnashib ketgan.
