Nashr bu haqda Ukrainaga litsenziya berishni qo‘llab-quvvatlovchi AQSh Kongresidagi respublikachi siyosatchilardan biriga tayanib xabar bergan.
Uning aytishicha, Amerika mudofaa kompaniyalari o‘z e’tirozlarini rasman intellektual mulk o‘g‘irlanishi va texnologiyalarning uchinchi tomonlarga berilishi xavfi bilan izohlashi mumkin. Biroq masalaning yana bir jihati Ukrainaning Patriot uchun raketa ishlab chiqarish jarayonini takomillashtirib, ularni katta hajmda va nisbatan arzon ishlab chiqarish imkoniyati bilan bog‘liq.
Zelenskiy: Hozir qog‘ozbozlik bilan ovoramiz
Ukraina prezidenti Volodimir Zelenskiy 8-avgust kuni urushning birinchi yilidayoq o‘sha paytdagi AQSh prezidenti Jo Baydendan Patriot tizimlarini ishlab chiqarishga doir litsenziyalarni berishni so‘raganini aytdi.
Zelenskiyning ta’kidlashicha, hozir Donald Tramp bilan tegishli litsenziyalarni berish bo‘yicha kelishuvga erishilgan. Shu bilan birga, u bunday imkoniyat Ukrainaga to‘rt yil avval berilganida vaziyat boshqacha bo‘lishi mumkinligini qayd etgan.
Ukraina rahbari hozir bu masalada byurokratik jarayonlar davom etayotganini tanqid qildi. Uning so‘zlariga ko‘ra, Ukrainaga haqiqiy raketalar uchib kelayotgan bir paytda litsenziyalar bo‘yicha hujjatlarni rasmiylashtirish jarayoni vaqt talab qilmoqda.
Zelenskiy Yevropa davlatlari bilan ham ayrim harbiy texnologiyalar va qurol-yarog‘larga litsenziya olish masalasi anchadan beri muhokama qilinayotganini bildirdi.
Litsenziya masalasi Bayden ma’muriyati davrida ham ko‘tarilgan
The Kyiv Independent jurnalisti Tim Zadorojniyning ma’lum qilishicha, Zelenskiy Patriot litsenziyalari masalasini Bayden ma’muriyatining hokimiyatdagi so‘nggi oylarida ilgari surgan.
The Atlantic ma’lumotlariga ko‘ra, Ukrainaning yuqori lavozimli amaldorlari bu taklifni o‘sha paytdagi AQSh mudofaa vaziri Lloyd Ostin va prezidentning milliy xavfsizlik masalalari bo‘yicha maslahatchisi Jyeyk Sallivanga taqdim etgan bo‘lishi mumkin. Biroq Kiyevning taklifi sabablari tushuntirilmagan holda rad etilgan.
Nashrning yozishicha, Ukraina Patriot uchun raketalarni o‘z ehtiyojidan ortiq miqdorda ishlab chiqarish imkoniyatiga ham ega bo‘lishi mumkin. Bunday raketalar keyinchalik AQSh ehtiyojlari uchun ishlatilishi yoki Vashingtonning ittifoqchilari va hamkorlariga sotilishi mumkin.
The Atlantic aynan shu imkoniyat Amerika tomonidagi xavotirlarning sabablaridan biri bo‘lishi mumkinligini qayd etgan.
Tramp: Raketalar o‘zimizga ham kerak
AQSh prezidenti Donald Tramp 6-avgust kuni jurnalistlarning Vashington Ukrainaga Patriot majmualari uchun qo‘shimcha tutib qoluvchi raketalar va Kiyev talab qilayotgan uzoq masofali raketalarni taqdim etadimi, degan savoliga javob berdi.
Tramp AQShning o‘ziga ham raketalar kerakligini aytgan.
Shuningdek, u sobiq prezident Jo Bayden ma’muriyatini Ukrainaga katta hajmda harbiy yordam berib, AQShning o‘q-dori zaxiralarini kamaytirib yuborganlikda aybladi.
Trampning ta’kidlashicha, u birinchi prezidentlik muddatini yakunlagan vaqtda AQShning o‘q-dori zaxiralari to‘la bo‘lgan, keyinchalik esa ularning katta qismi Ukrainaga berilgan. Hozir Vashington ushbu zaxiralarni qayta tiklashga harakat qilmoqda.
Shu tariqa, Patriot raketalarini Ukrainada ishlab chiqarish uchun litsenziya berish masalasi nafaqat Kiyevning havo hujumidan mudofaa imkoniyatlarini kuchaytirish, balki Amerika mudofaa sanoati manfaatlari, texnologiyalarni himoya qilish va AQShning o‘z harbiy zaxiralarini to‘ldirish masalalari bilan ham bog‘lanmoqda.
