AQSh prezidenti Donald Tramp o‘zining TruthSocial sahifasida «AQSh yangi hududi» degan yozuv bilan Ho‘rmuz bo‘g‘ozi xaritasini e’lon qildi.
Tramp 14-avgust kuni Ho‘rmuz bo‘g‘ozini AQSh hududi deb e’lon qilish rejasi borligini ma’lum qilgan edi. O‘shanda Oq uy rahbari bu e’lon Eron bilan urush tugaganidan keyin amalga oshirilishini aytgandi.
Ertasi kuni Eron tashqi ishlar vaziri o‘rinbosari Kozim G‘aribobodiy bo‘g‘ozni egallab bo‘lmasligini ta’kidladi. «Ho‘rmuz bo‘g‘ozini na tvit, na aviatashuvchi, na buyruq chiqarish, na saylovoldi nutqi bilan zabt etib bo‘lmaydi», - dedi u.
AQSh prezidenti sahifasidagi post e’lon qilingach, G‘aribobodiy Tramp Ho‘rmuz bo‘g‘ozini AQSh hududi deb atab, adashayotganini va Eron buni tez orada tuzatishini aytdi. «Tramp abadiy Fors ko‘rfazi nomini to‘g‘ri yozganidek, uning Ho‘rmuz bo‘g‘ozi borasidagi yanglish fikri ham tez orada yo tuzatiladi, yo biz bu adashgan odamning xatolarini o‘zimiz tuzatamiz», - deb yozdi u o‘zining X sahifasida.
Yaqin Sharqning ko‘pgina mamlakatlarida ko‘rfaz Arabiston yoki Arab ko‘rfazi deb ataladi. Eron bunday nomlanishga qarshi chiqadi. Fors ko‘rfazi - uning an’anaviy geografik nomi bo‘lib, hozirgi Eron joylashgan qadimgi Fors (Persiya) sharafiga qo‘yilgan.
O‘tgan yilning may oyida The Associated Press ikki amerikalik amaldorga tayanib, AQSh Fors ko‘rfazini Arabiston yoki Arab ko‘rfazi deb atashi haqida xabar bergandi. Keyinroq Tramp Eron bu qadamga «qat’iy e’tiroz bildirishini aniq tushuntirgani» sababli Fors ko‘rfazini Arab ko‘rfazi deb qayta nomlash rejalaridan voz kechdi.
