Bu haqda Zaporijjya viloyati harbiy ma’muriyati rahbari Ivan Fyodorov ma’lum qildi. Uning so‘zlariga ko‘ra, Rossiya dronlarining zarbalari oqibatida shaharda turar joy binolari hamda noturar ob’yektlar shikastlangan.
Zarbalardan keyin ob’yektlardan birida yong‘in chiqqan. Dastlabki ma’lumotlarga ko‘ra, hujum oqibatida bir kishi halok bo‘lgan, olti kishi turli darajada jarohat olgan.
Fyodorov vayronalar ostida odamlar qolib ketgan bo‘lishi mumkinligini bildirgan. Hodisa joyida qutqaruv va favqulodda xizmatlar ish olib bormoqda.
Shuningdek, tun davomida Zaporijjyaga boshqariladigan aviatsiya bombalaridan zarba berish xavfi haqida ham ogohlantirish e’lon qilingan. Ayrim Ukraina nashrlari shaharga hujumda dronlar bilan bir qatorda boshqariladigan aviabombalar qo‘llangani haqida xabar bermoqda.
Hujum oqibatlari va jabrlanganlar haqidagi ma’lumotlarga aniqlik kiritish ishlari davom etmoqda.
