Farg‘ona viloyatida suyultirilgan gaz ta’minotidagi uzoq kechikishlar hamon davom etmoqda. Kun.uz'ga Bag‘dod tumani Qirqvolida qishlog‘idan murojaat kelib tushdi.
Murojaat videosida o‘nlab odamlar – qishloq ahli suyultirilgan gaz ballonlarini uzun navbatga terib qo‘ygan holda, propan ballonlarini olib keladigan yuk mashinasi kelishini kutayotganini ko‘rish mumkin. Odamlarga bir kun oldin “ertaga gazballon keladi” deyilgan.
“2026-yil 18-avgust. Shom bo‘lyapti, mana, Oy chiqdi. Ertalab soat 9 dan beri o‘tiribmiz, ishimizni qilmay. [Suyultirilgan gaz oxirgi marta] 12-mayda kelgan. Mana, uch oydan o‘tib ketdi, gazballon yo‘q.
Deyarli 12 soatdan beri o‘tiribmiz. Ta’rifga til ojiz-da endi. Ilon Mask Marsga bir balolar quramiz deyapti, biz esa gazballon kutib o‘tiraveramiz. Yaxshi bo‘lib ketadi, xudo xohlasa”, deydi murojaatchi.
Odamlar tuman gaz idorasiga borib, idora boshlig‘iga shikoyat qilgan. U jazirama issiq tufayli xavfsizlik yuzasidan soat 11:00 – 17:00 oralig‘ida gazballonlarni to‘ldirishga cheklov qo‘yilganini aytib, kechikishni shu bilan izohlagan.
“[Gazballonlar tashuvchi] haydovchiga telefon qilib, bugun keladimi yo ertagami, shuni bizga uzil-kesil bilib bering”, – deyishgan bunga javoban qishloq odamlari.
Gaz idorasi rahbari esa haydovchi bugun keloladimi-yo‘qmi, o‘zi ham bilmasligi, bu – Oltiariqdagi quyish shoxobchasiga va u yerdagi navbatlarga bog‘liqligini aytgan.
Kun.uz uch hafta avval, iyul oyi oxirida Farg‘ona viloyati Quva tumanida ham 100 kundan oshibdiki, suyultirilgan gazballon yetkazib berilmagani haqida reportaj e’lon qilgan edi. Ko‘p o‘tmay aholi xonadonlariga propan ta’minotidagi uzoq kechikishlar butun respublikaga yoyilgani ma’lum bo‘lgandi.
O‘shanda Energetika vazirligi bu yo‘nalishdagi mavjud muammolarni bosqichma-bosqich bartaraf etish ishlari olib borilayotganini bildirgan.
Ma’lumot uchun, Farg‘ona viloyatidagi 509 mingta xonadonning ehtiyojini qoplash uchun (har biriga 20 kilodan) oyiga o‘rtacha 10,2 ming tonna suyultirilgan gaz kerak bo‘ladi, ammo yil boshidan beri biror marta oyiga buncha propan yetkazib berilmagan.
Yanvar oyida 8,5 ming tonna bo‘lgan ko‘rsatkich oydan oyga pasayib, may oyida 4 ming tonnaga, iyunda 4,9 ming tonnaga tushib qolgan. Bu esa ehtiyojning yarmini ham qoplamaydi.
