Vakant oʻrinlarga qabul boʻyicha abituriyentlarni qiziqtirayotgan asosiy savollarga javob berildi.
Kimlar vakant oʻrinlarga hujjat topshira oladi?
Kirish imtihonlarida ishtirok etib, 56,7 va undan yuqori ball toʻplagan, ammo oʻqishga kira olmagan abituriyentlar boʻsh qolgan oʻrinlar uchun hujjat topshirishi mumkin.
Shuningdek, qabulning tanlov bosqichida oliy taʼlim muassasasi va taʼlim yoʻnalishini tanlamagan abituriyentlarga ham vakant oʻrinlar uchun ariza berish imkoniyati berilgan.
5 tagacha yoʻnalish tanlash mumkin
Abituriyent oʻzining fanlar majmuasiga mos taʼlim yoʻnalishlarida boʻsh oʻrinlar mavjud boʻlsa, 5 tagacha yoʻnalish va oliy taʼlim muassasasini tanlashi mumkin.
Bunda kunduzgi, kechki yoki masofaviy taʼlim shakllaridan birini tanlash imkoniyati mavjud.
Ariza qayerdan beriladi?
Vakant oʻrinlar uchun ariza Bilim va malakalarni baholash agentligining shaxsiy kabineti orqali topshiriladi.
Abituriyent shaxsiy kabinetidagi «Vakant oʻrinlar uchun ariza berish» boʻlimi orqali tanlovda ishtirok etishi mumkin.
Grant emas, bazaviy kontrakt asosida qabul qilinadi
Vakant oʻrinlar uchun roʻyxatdan oʻtgan abituriyentlar toʻplagan ballari ketma-ketligiga qatʼiy rioya qilingan holda saralanadi.
Tanlovdan muvaffaqiyatli oʻtganlar bazaviy toʻlov-kontrakt asosida talabalikka tavsiya etiladi. Yaʼni ushbu vakant oʻrinlarga qabul davlat granti asosida emas.
Arizalar 28-avgustgacha qabul qilinadi
Vakant oʻrinlar uchun ariza berish jarayoni 22-avgustdan 28-avgustgacha davom etadi.
Qabul yakunlanganidan soʻng bir hafta ichida tanlov natijalari - mandat eʼlon qilinishi belgilangan.
Nega ayrim yoʻnalishlarda vakant oʻrin yoʻq?
Agar abituriyent tanlamoqchi boʻlgan yoʻnalish tizimda koʻrinmasa, bu yoʻnalish boʻyicha belgilangan qabul kvotasi toʻlgan boʻlishi mumkin.
Qoʻshimcha qabul barcha taʼlim yoʻnalishlariga emas, faqat qabul parametrlari toʻlmay qolgan vakant oʻrinlarga amalga oshiriladi.
