Kanada hukumati 8-sentabridan boshlab AQShdan import qilinadigan tovarlarga 15, 25 va 50 foiz miqdorida javob bojlarini joriy qiladi. Cheklovlar qiymati 20 milliard dollarga teng 700 turdagi mahsulotlarga taʼsir qilishi mumkin. Bu haqda Reuters xabar berdi.
Qayt etilishicha, Kanada AQShdan olib kiriladigan poʻlat, alyuminiy, mebel va kiyim-kechak mahsulotlariga 50 foizlik boj joriy etadi. Pishloq, maishiy texnika hamda ayrim dengiz mahsulotlari uchun tariflar 25 foizni tashkil qiladi. Elektronika va asbob-uskunalar esa 15 foizlik bojga tortiladi. Tariflar roʻyxatiga, shuningdek, tayyor oziq-ovqat mahsulotlari, parfyumeriya, gigiyena vositalari, plastmassa buyumlar, yogʻoch-taxta, qogʻoz mahsulotlari, gilamlar, mototsikllar, sanoat uskunalari va temiryoʻl lokomotivlari kiritilgan.
Kanada Moliya vazirligi oʻz bayonotida adolatli savdo bitimiga erishish uchun AQSH bilan faol muzokaralar olib borganini taʼkidlab oʻtgan.
«Soʻnggi kunlarda AQSH Kanada manfaatlariga mos kelmaydigan yangi shartlarni joriy qildi. Ular Kanadadan koʻp narsa soʻrab, evaziga juda kam narsa taklif qilishdi», deyiladi vazirlik bayonotida.
Avvalroq, Donald Tramp Kanadaning AQSH mahsulotlariga nisbatan «kamsituvchi munosabati»ga javoban ushbu mamlakatning qariyb 20 mlrd dollar qiymatdagi tovarlariga qoʻshimcha 50 foizli bojlar joriy etilishini maʼlum qilgandi.
