Chorshanba tongida Islomoboddagi shifoxonaning tugʻruq boʻlimida kelib chiqqan yongʻin oqibatida kamida 14 nafar yangi tugʻilgan chaqaloq halok boʻldi.
Ëngʻin 26-avgust kuni ertalab soat 07:00lar atrofida Pokiston Tibbiyot fanlari institutining (PIMS) «Onalik va bolalikni muhofaza qilish» boʻlimida boshlangan. Bu haqda mahalliy nashrlarga tayanib, Reuters xabar bermoqda.
Qutqaruvchilarning soʻzlariga koʻra, uchinchi qavatdagi fojiali yongʻinga chaqaloqlar xonasida konditsionerning portlashi sabab boʻlgan. Yongʻin boshlangan vaqtda palatada 15 nafar yangi tugʻilgan chaqaloq boʻlgan, ulardan faqat biri qutqarib qolingan. Omon qolgan yagona chaqaloqni shifokor qutqarib qolgan.
Mahalliy Geo TV telekanali 15 nafar qurbon borligini aytgan boʻlsa, bosh vazir idorasi 14 chaqaloq halok boʻlganini tasdiqlamoqda.
Qutqaruv xizmati xodimlari kasalxonadan kamida 19 kishini qutqargan. Ular orasida 10 nafar ayol, yetti nafar bola va ikki nafar erkak bor.
«BBC Urdu» xizmati kasalxona rasmiysidan iqtibos keltirishicha, yongʻin konditsioner blokida boshlangan va kislorod ulanmalari orqali tezda alangalanib ketgan. Sogʻliqni saqlash vaziri Mustafo Kamol yongʻin sodir boʻlgan palatadagi chaqaloqlar yo inkubatorlarda boʻlgan, yoki kislorod uskunalariga ulanganini aytdi.
Reuters guvohining soʻzlariga koʻra, boʻlim hududi oʻrab olingan va kasalxona binosi tashqarisida tez yordam mashinalari toʻplangani koʻringan.
